Endurskoða áætlun ef þörf krefur
Reuters
Íslensk stjórnvöld, heilbrigðisyfirvöld og eftirlitsstofnanir munu ef þörf krefur endurskoða aðgerðaáætlun vegna PIP-brjóstapúða sem kynntar voru 10. janúar síðastliðinn eftir því sem ástæða er til, komi fram nýjar upplýsingar um áhrif þeirra á heilsufar.
Velferðarráðuneytið hefur sent frá sér tilkynningu sem beint er til kvenna með PIP-brjóstafyllingar í tengslum við ákvörðun stjórnvalda um að bjóða konunum ómskoðun til að kanna ástand púðanna og brottnám þeirra leiði skoðun í ljós að þeir leki.
„Eins og fram kom í tilkynningu velferðarráðuneytisins 10. janúar síðastliðinn verður umræddum konum sent bréf á næstu dögum um fyrirkomulag ómskoðananna, móttöku tímapantana og öðrum nauðsynlegum upplýsingum. Ráðuneytið vinnur að því að ganga frá öllum þáttum sem þurfa að liggja fyrir varðandi skipulag og framkvæmd ómskoðana áður en upplýsingabréf verður sent út.
Brjóstafyllingar frá franska fyrirtækinu PIP (Poly Implant Prothese) hafa verið notaðar í aðgerðum við brjóstastækkanir í um 65 löndum víðsvegar um heiminn. Eins og fram er komið reyndust umræddar brjóstafyllingar franska fyrirtækisins sem sem verið höfðu á markaði undanfarinn áratug vera falsaðar þar sem í þeim var annars konar sílikonefni en það sem fyrirtækið hafði fengið gæðavottað með CE-gæðamerkingu,“ segir í tilkynningunni.
Fram kemur að náið samstarf sé milli heilbrigðisyfirvalda Evrópuþjóða og þar til bærra eftirlitsstofnana sem deili með sér öllum mikilvægum upplýsingum sem fram komi varðandi PIP-brjóstafyllingarnar og niðurstöðum rannsókna sem þegar hafi verið gerðar á mögulegum áhrifum þeirra á heilsufar.
„Ráðleggingar íslenskra heilbrigðisyfirvalda og aðgerðir sem stjórnvöld hafa ákveðið að grípa til hér á landi vegna PIP-brjóstafyllinga byggjast á sömu upplýsingum og aðrar þjóðir hafa lagt til grundvallar sínum viðbrögðum og eru eftirfarandi:
- Vísbendingar eru um að leki komi fram í hærra hlutfalli PIP-brjóstapúða en brjóstapúðum frá öðrum framleiðendum. Þetta hefur þó ekki verið staðfest.
- Komi leki frá PIP-brjóstapúðum er meiri hætta á ertingu, bólgumyndun og óþægindum vegna þess en við leka frá öðrum brjóstapúðum.
- Niðurstöður rannsókna sérfræðingahópa í Bretlandi og Frakklandi sem beinast að áhrifum PIP-fyllinga á heilsu kvenna benda hvorki til þess að fyllingarnar valdi aukinni hættu á krabbameini né að þær hafi eiturverkandi áhrif á líkamsvefi.“
