Mikil eldhætta
Hestfjörður. www.mats.is
„Við verðum þarna þar til bíllinn er kominn á rétt ról má segja; allavega búið að losa hann,“ segir Þorbjörn Jóhann Sveinsson, slökkviliðsstjóri á Ísafirði, í samtali við mbl.is, spurður út í viðbúnað í norðanverðum Hestfirði í Ísafjarðardjúpi í kvöld.
Þar fór tankbíll frá Skeljungi út af veginum í hálku á tíunda tímanum í kvöld. Bifreiðin hafnaði í skurði fyrir ofan veg. Hún liggur ofan á tanknum, skagar aðeins út á veg og stendur beint upp í loft. Um 39.000 lítrar af bensíni eru í tanknum. „Það er ekki mikill leki en eitthvað dreitlar,“ segir Þorbjörn. Aðspurður segir hann að ekki sé að sjá að það hafi komið gat á tankinn. Menn finna hins vegar sterka bensínlykt á svæðinu.
Viðbúnaðurinn er mikill vegna sprengihættu og menn óttast umhverfisslys. Allt tiltækt lið var kallað út í kvöld, m.a. starfsmenn frá Vegagerðinni og Umhverfisstofnun.
„Það er náttúrlega bullandi eldhætta. Við höfum ekki náð að losa geymasambönd eða neitt. Það er efst í bílnum. Þetta er svo ótryggt að ég þori ekki að senda mannskap upp í hann fyrr en við erum búin að tryggja það. Á meðan er eldhætta,“ segir Þorbjörn.
Vegurinn lokaður
Hann bendir hins vegar á að það sé langt í næstu byggð og því stafi almenningi ekki ógn af lekanum. Þá er lögreglan búin að loka veginum og verður hann lokaður í nótt á meðan menn athafna sig á vettvangi. Verið er að tryggja svæði sem nær um 160 metra í hvora átt frá slysstað.
Þorbjörn segir að það sé hætt við mengunarslysi „en það verður þá bara frekar að vera það en að fórna mannskap. Allavega vil ég tryggja það þannig að það verði ekki slys á mannskap,“ segir Þorbjörn
Aðstæður á vettvangi eru erfiðar. Þar er fljúgandi hálka og rigning, og þá er farið að hvessa. Þorbjörn segir að vegurinn að slysstað sé seinfarinn.
Sprauta froðu á bensínið
„Við erum á vettvangi og erum að reyna að útvega okkur verkfæri. Við erum að keyra inn froðubifreið þarna inn eftir; ætlum að setja yfir þetta froðu,“ segir Þorbjörn. Þá stendur til að senda tankbíl á svæðið með meira vatn. Þá er von á kranabíl og bíl frá Vegagerðinni með sand svo menn geti fótað sig í hálkunni. „Það er glerhált þarna,“ segir Þorbjörn.
Þá hefur slökkviliðið verið í sambandi við Slökkvilið höfuðborgarsvæðisins vegna málsins. Slökkviliðið á Ísafirði hefur ekki kallað eftir aðstoð að sunnan en það reynir að ná utan um málið með þeim búnaði sem það hefur til umráða.
Þá er von á þremur tankbílum frá Ísafirði, bæði frá Skeljungi og Olíudreifingu, sem verða notaðir til að dæla olíu úr bílnum sem hafnaði utan vegar. Miðað við aðstæður er ekki ljóst hvernig eða hvenær það mun eiga sér stað.
Skeljungur hefur opnað mengunarstjórnstöð vegna málsins en verið er að meta aðstæður.
Ökumaður tankbílsins hlaut ekki alvarleg meiðsl.
