„Þetta er á kafla þar sem við berum yfirleitt ekki á. Það eru svo litlir kaflar sem við eigum að bera á í flughálku í Djúpinu,“ segir Geir Sigurðsson rekstrarstjóri hjá Vegagerðinni á Ísafirði aðspurður í samtali við bb.is, um af hverju ekki var borið sand á vegarkaflann þar sem tankbíll Skeljungs fór út af veginum í Hestfirði í Ísafjarðardjúpi í gærkvöldi.

„Við getum okkur helst til að á þessum tíma sem slysið varð í gærkvöldi var búið að rigna á frosinn veg, mjög hált, en það er þannig í vinnureglum Vegagerðarinnar að við eigum ekki að gera neitt í því á löngum kafla í Djúpinu. Það er bara þannig,“ segir Geir í samtali við bb.is um aðstæðurnar þegar slysið varð. Geir bendir í samtalinu á að slysið gerist á þeim tíma þegar ekki er þjónusta á vegum Vegagerðarinnar en það breyti því ekki að þetta er á stað þar sem vanalega er ekki borið á. Aðspurður hvort að niðurskurður valdi því segir Geir að svo sé ekki heldur hafi vinnureglur Vegagerðarinnar ávallt verið þannig.

Búið er að opna veginn og hefur bb.is eftir Geir að nú séu alveg þokkalegar akstursaðstæður. Það sé þó hálka en ekki flughálka.

Hestfjörður. © Mats Wibe Lund