Jónína Rós Guðmundsdóttir, þingmaður Samfylkingarinnar.

„Ég greiddi atkvæði með því að allir fjórir yrðu ákærðir og ég mun bara standa við mitt,“ segir Jónína Rós Guðmundsdóttir, þingmaður Samfylkingarinnar, aðspurð hvort hún telji að halda eigi Landsdómsákærunni á hendur Geir H. Haarde, fyrrum forsætisráðherra, til streitu eða hvort draga eigi hana til baka eins og þingsályktunartillaga frá sjálfstæðismönnum gerir ráð fyrir.

Alþingi samþykkti haustið 2010 að ákæra Geir fyrir Landsdómi með 33 atkvæðum gegn 30 en hins vegar var því hafnað að þrír aðrir fyrrum ráðherrar yrðu ákærðir, þau Ingibjörg Sólrún Gísladóttir, fyrrum utanríkisráðherra, Árni M. Mathiesen, fyrrum fjármálaráðherra, og Björgvin G. Sigurðsson, fyrrum viðskiptaráðherra.

Spurð að því hvort hún ætli að styðja tillögu um að þingsályktunartillaga sjálfstæðismanna verði tekin af dagskrá þingsins segist hún ætla að styðja slíka tillögu komi hún fram. Hún leggur þó áherslu á að þingsályktunartillagan verði þó alltaf rædd í fyrstu umræðu en síðan verði kosið um það hvort taka eigi hana af dagskrá.

„Þannig að málið verður rætt og síðan í lokin myndi þá þessi rökstudda dagskrártillaga koma fram og ef hún kemur fram þá mun ég styðja hana,“ segir Jónína.

Innt eftir skoðun sinni á grein Ögmundar Jónassonar, innanríkisráðherra, í Morgunblaðinu í gær þar sem hann sagði meðal annars að rangt hafi verið að ákæra Geir segir Jónína að hún hafi valdið henni verulegum vonbrigðum.

„Ég er á því að þessi þingsályktunartillaga Bjarna Benediktssonar [formanns Sjálfstæðisflokksins] hefði ekki átt að koma fyrir þingið vegna þess að ég tel hana vera ákveðið inngrip í dómsmál sem farið er af stað. Þannig að það kemur mér mjög á óvart að ráðherra dómsmála skuli taka svona einarða afstöðu með því að málið sé rætt,“ segir Jónína.