Helgi Ármannsson er fjórði bróðirinn sem gegnir hlutverki stallara. ml.is

Þeir eru sólgnir í stallaraembættið, bræðurnir frá Vesturholtum í Þykkvabæ. Nú á dögunum var sá fjórði af fimm bræðrum sem þaðan koma kjörinn stallari nemendafélagsins Mímis við Menntaskólann að Laugarvatni. Fimmti bróðirinn stundaði ekki nám á Laugarvatni og því ekki mögulegt fyrir hann að gegna embættinu.

Arfleifðin hófst með kjöri Guðjóns Ármannssonar árið 1997. Árið 2000 var bróðir hans, Jón Ólafur, kosinn stallari og þriðji bróðirinn bættist svo við í janúar 2007, en þá var það Arnar sem tók við embættinu.

Fjórði bróðirinn, Helgi, var svo kjörinn stallari í gær. Helgi segir aðra hvata hafa legið að baki framboðinu en pressuna af arfleifðinni sem þrír bræðurnir á undan mynduðu. Að sögn Helga heillar aðallega að geta lagt hönd á plóg í félagslífi skólans, en um 166 nemendur stunda nám við ML. Hann fer fyrir 13 manna stjórn, og því stór og góður hópur sem hefur félagslífið á herðum sér.

Fyrsta embættisverk Helga var að bóka hljómsveitina Retro Stefson á skólaball sem haldið verður í félagsheimilinu Borg í Grímsnesi.

Foreldrar bræðranna eru þau Bjarnveig Jónsdóttir og Ármann Ólafsson.