Yfirgnæfandi meirihluti aðildarfélaga ASÍ vill að kjarasamningarnir haldi gildi sínu en það er „grenjandi óánægja“ vegna vanefnda ríkisstjórnarinnar, að sögn Gylfa Arnbjörnssonar, forseta ASÍ, en formannafundi vegna endurskoðunar kjarasamninga er nýlokið. Samninganefnd ASÍ mun taka ákvörðun á morgun um gildi kjarasamninganna.

Í frétt á vefsíðu ASÍ af formannafundinum segir að gríðarleg gremja hafi komið fram í garð ríkisstjórnarinnar og sagði Gylfi í upphafi fundar að það væri makalaus staða að það væri ríkisstjórnin sem skyldi vera sá aðili sem ógnaði þeirri sátt sem náðst hefði á vinnumarkaði. Á fundinum kom hver formaðurinn á fætur öðrum í ræðustól og lýsti óánægju sinni með framgöngu ríkisstjórnar Jóhönnu Sigurðardóttur.

Fram kom að ljóst væri að ríkisstjórnin hefði ekki staðið við mörg af þeim ákvæðum sem hún skrifaði undir í tengslum við kjarasamningana 5. maí og af þeim svikum stafaði reiði verkalýðshreyfingarinnar.

Forsendur gagnvart atvinnurekendum ganga eftir

Landssambönd og félög hafa að undanförnu fengið umboð frá félögunum áður en ákvörðun er tekin varðandi endurskoðun kjarasamninganna. Gylfi segir í samtali við mbl.is að markmið þessa fundar hafi verið að fá upplýsingar frá félögunum og bera saman bækur um næstu skref.

„Nokkur félög vilja segja samningunum upp en yfirgnæfandi meirihluti okkar aðildarfélaga vill halda þessu áfram. Forsendur okkar gagnvart atvinnurekendum eru að ganga eftir og ekki tilefni viðbragða gagnvart þeim, en að sama skapi er alveg grenjandi óánægja með aðkomu ríkisstjórnarinnar og vanefndir hennar,“ segir Gylfi.

Á formannafundinum í dag rifjaði hann upp að mikil umræða fór fram á vettvangi ASÍ haustið 2010 og samtökin beittu sér fyrir því að reynt yrði að ná breiðri sátt á milli vinnumarkaðarins og stjórnmálanna um leiðir út úr kreppunni. „Ég held að niðurstaða samninganna á síðasta ári hafi undirstrikað að það varð ofan á,“ segir Gylfi.

„Allur vinnumarkaðurinn fór þessa sömu leið, þannig að kjarasamningurinn sem ASÍ og SA gerðu í byrjun maí var grundvöllur að mjög breiðri sátt um þróun kjaramála. Það er þess vegna ömurlegt til þess að vita að stjórnvöld skuli ógna þessari sátt með framgönguleysi sínu. Maður hefði haldið að það væri happ hverrar ríkisstjórnar að eiga jákvætt samstarf við samningsaðila til að verja slíka sátt en ekki vera sá aðili sem græfi undan henni,“ segir Gylfi.