Ólína Þorvarðardóttir, þingmaður Samfylkingarinnar, á Alþingi ásamt Ögmundi Jónassyni, innanríkisráðherra. mbl.is/Ómar

„Burtséð frá því hvort hægt sé að styðja það lagalegum rökum að Alþingi sé heimilt að grípa inn í gang þessa réttarhalds sem nú er hafið gegn Geir Haarde þá hlýtur það að teljast eins óeðlilegt og hugsast getur,“ sagði Ólína Þorvarðardóttir, þingmaður Samfylkingarinnar, á Alþingi í dag.

Ólína sagðist harma þennan málatilbúnað og að hér væru á ferðinni að hennar áliti pólitísk afskipti af dómsmáli sem þegar væri hafið. Hún sagði vandséð að málstað Geirs væri betur borgið með því að málið gegn honum yrði dregið til baka „í pólitísku moldviðri“ á Alþingi frekar en að málið yrði til lykta leitt fyrir landsdómi.

„Það er dapurlegt að málið skuli endurvakið hér á þessum vettvangi í pólitísku moldviðri og verði málinu ekki vísað frá hér í dag þá er ljóst orðið að Alþingi Íslendinga rís ekki lengur undir nafni sem ein af þremur meginstoðum stjórnskipunar landsins,“ sagði Ólína.

Hún bætti því við að lokum að yrði niðurstaðan sú að málinu yrði ekki vísað frá væri fráleitt annað en að því yrði vísað til stjórnskipunar- og eftirlitsnefndar Alþingis.