Ratsjármynd tekin klukkan 8:15 í morgun. „Hún sýnir vel hvað úrkomubakkinn er þéttur og samfelldur. Hann kemur í rólegeitum inn á landið. Fer ekki yfir það heldur hægir ferðin yfir miðju landinu síðar í dag um leið og sjálf lægðin berst til austurs (undan V-áttinni uppi) fyrir sunnan land. Úrkomusvæðið klárar sig síðan og leysist upp nokkurð hratt síðar í dag og í kvöld,“ skrifar Einar á bloggi sínu. www.vedur.is

Samfelld snjókoma verður sunnan- og suðvestanlands í 3 til 4 klst., skrifar Einar Sveinbjörnsson veðurfræðingur á bloggi sínu í dag. Hann segir talsverðan byl verða á fjallvegum þar sem A-áttin nær 12-15 m/s. „Eins sums staðar á Suðurnesjum, en meira sem mugga í hægum vindi á höfuðborgarsvæðinu,“ skrifar Einar.

„Það hefur gerst í tví- eða þrígang í vetur að skil með úrkomu koma suðvestan úr hafi og inn á land og með þeim nær varla að blota sem heitið getur. Úrkoma fellur því víðast öll sem snjókoma. Venjulegi gangurinn í þessu er að fyrst snjói í skamma stund og fari síðan yfir í leysingu með tveggja til fimm stiga hita,“ skrifar Einar.

„Nú eru einmitt enn ein skilin af þessari tegundinni að koma inn á landið. Samfelld snjókoma verður sunnan- og suðvestanlands í 3 til 4 klst.“

Einar segir ástæðu þessa vera einna helst að blöndun er við loftið vestur- og norðvesturundan sem verið hefur í kaldara lagi síðustu vikurnar. Einnig hafi yfirborðshiti sjávar verið að gefa eftir miðað við það sem hefur verið undanfarna vetur. „Sú þriðja og kannski veigamesta þegar allt er talið er að vindur í háloftunum (í um 5 km hæð) er nálægt því að vera hávestanstæður í stað þess að vera úr suðvestri eins og oftast er þegar skil koma úr suðvestri með lægðum.“

Á þriðjudag er síðan spáð enn einum skilum af þessari gerðinni með mestmegnis snjókomu.

Bloggfærsla Einars Sveinbjörnssonar