Össur og Jóhanna þung á brún í gær. mbl.is/Golli

Frávísunartillaga sem lögð var fram gegn tillögu Bjarna Benediktssonar var felld með 31 atkvæði gegn 29 í gærkvöldi. Alþingi mun því fá tillögu Bjarna um að falla frá ákæru á hendur Geir H. Haarde til efnislegrar meðferðar. Samþykkt var að vísa málinu til meðferðar í stjórnskipunar- og eftirlitsnefnd.

„Ég er mjög ánægður með þessa niðurstöðu enda mikilvæg mannréttindi undir. Hins vegar get ég ekki neitað því að það kom mér á óvart hvað margir af þeim sem áður hafa lýst þeirri skoðun sinni að ekki sé tilefni til málshöfðunar á hendur Geir H. Haarde voru á móti því að vilji Alþingis, sem um leið er vilji ákæruvaldsins í málinu, væri skýr og öllum vafa um hann yrði eytt,“ segir Bjarni Benediktsson, formaður Sjálfstæðisflokksins.

Í umfjöllun um málið í Morgunblaðinu í dag segist Bjarni vona, að það fái skjóta meðferð en það tók Alþingi 17 daga að afgreiða ákvörðun um ákærur árið 2010, sem endaði með ákæru á hendur Geir.

Þráinn Bertelsson, þingmaður VG, segir að Alþingi hafi brugðist í þessu máli. „Oft hefur það verið reiknað út að þessi stjórn hangi á einu atkvæði og ég ætla ekki að bera ábyrgð á því að halda Ögmundi Jónassyni og Össuri Skarphéðinssyni í embætti,“ segir Þráinn. Þá telur hann fýsilegt að boðað verði til alþingiskosninga.