Forystumenn ASÍ og Samtaka atvinnulífsins undirrituðu samkomulag í húsnæði ASÍ eftir hádegi í gær um að virkja ekki endurnýjunarákvæði kjarasamninga. mbl.is/Eggert

Launahækkanir í kjarasamningunum sem ASÍ og Samtök atvinnulífsins samþykktu í gær að gilda mundu áfram, reynast mörgum fyrirtækjum erfiðar. Ástæðan er ekki síst sú að hjól atvinnulífsins hafa ekki farið í gang af þeim krafti sem vonir stóðu til, að mati Vilhjálms Egilssonar, framkvæmdastjóra SA.

Með framlengingu samninganna munu laun á almennum vinnumarkaði hækka um 3,5% um næstu mánaðamót.

„Við sjáum að útflutningsgreinarnar munu eiga miklu auðveldara með að bera þessar hækkanir heldur en fyrirtæki sem starfa fyrst og fremst á þröngum heimamarkaði. Þar getur þetta verið mjög erfitt og það sem þarf til að koma er í fyrsta lagi hagræðing. Ef hún næst ekki þarf að hækka verð og ef menn geta það ekki, þá þurfa þeir væntanlega að fækka starfsfólki,“ segir hann.

Í umfjöllun um kjaramálin í Morgunblaðinu í dag segja forsvarsmenn ASÍ að þrátt fyrir mikla tregðu á stjórnarheimilinu hafi tekist að þoka áfram mikilvægum málum en ríkisstjórnin er gagnrýnd: „Ég hef ekki í þau 20 ár sem ég hef verið að starfa á þessum vettvangi fundið jafn mikla gremju út í nokkur stjórnvöld,“ segir Gylfi Arnbjörnsson, forseti ASÍ.