Alls fluttust 1.404 fleiri frá landinu á síðasta ári en til þess mbl.is/Eggert Jóhannesson

Alls fluttust 1.404 fleiri frá landinu á síðasta ári en til þess. Það dró úr brottflutningi á árinu miðað við árið áður, þegar 2.134 fluttust úr landi umfram aðflutta.

Alls fluttust 6.982 frá landinu, samanborið við 7.759 á árinu 2010. Alls fluttust 5.578 manns til Íslands árið 2011, sem er svipaður fjöldi og árið 2010 þegar 5.625 manns fluttu til landsins, samkvæmt frétt Hagstofu Íslands.

Mun fleiri íslenskir ríkisborgarar flytja heldur en útlenskir

Íslenskir ríkisborgarar voru mun fleiri en erlendir í hópi brottfluttra, eða 4.135 á móti 2.847. Íslenskir ríkisborgarar voru einnig fleiri meðal aðfluttra en erlendir, 2.824 á móti 2.754. Alls fluttust því 1.311 íslenskir ríkisborgarar úr landi umfram brottflutta, en 93 erlendir ríkisborgarar.

„Árið 2004 hófust tímar mikilla búferlaflutninga til og frá landinu sem standa enn.  Fyrstu fimm árin, 2004-2008, fluttist 15.921 einstaklingur til Íslands umfram brottflutta. Undanfarin þrjú ár (2009-2011) snerist dæmið hinsvegar við og héðan hafa alls 8.373 einstaklingar flust til útlanda umfram aðflutta. Á þessum átta árum hafa því flust 6.918 manns til landsins umfram brottflutta,“ segir í frétt Hagstofu Íslands.

Noregur tekur við flestum íslenskum ríkisborgurum

Árið 2011 fluttust 3.022 íslenskir ríkisborgarar til Noregs, Danmerkur eða Svíþjóðar af 4.135 alls. Flestir fluttust til Noregs, eða 1.508. Flestir aðfluttir íslenskir ríkisborgarar komu einnig frá þessum löndum eða 2.113 af 2.824 alls, flestir þó frá Danmörku, eða 1.206. Á sama tíma fluttust flestir erlendir ríkisborgarar til Póllands, eða 1.000 af 2.847 alls. Þaðan komu líka 768 erlendir ríkisborgarar. Þetta flutningsmynstur hefur haldist óbreytt frá því 2009, nema hvað Noregur hefur orðið hlutfallslega vinsælli meðal íslenskra ríkisborgara og dregið hefur úr vægi Póllands sem helsta áfangastaðar erlendra ríkisborgara.

Unga fólkið fer

Árið 2011 voru flestir brottfluttra á aldrinum 25–29 ára, flestir þó 24 ára af einstaka árgöngum. Fjölmennasti hópur aðfluttra var á aldrinum 20–24 ára. Tíðasti aldur aðfluttra einstaklinga var 23 ára. Þegar tekið er tillit til fjölda brottfluttra umfram aðflutta var mest fækkun vegna fólksflutninga frá landinu í aldurshópnum 30–34 ára.

Árið 2011 fluttu 986 fleiri karlar úr landi en til landsins og 418 fleiri konur fluttu frá landinu en til þess. Fram til ársins 2003 fluttust að jafnaði fleiri konur til landsins en karlar. Þessi þróun snerist við á tímabilinu frá 2004–2008. Á þeim árum fluttust til landsins 4.215 fleiri karlar en konur. Á undanförnum þremur árum hafa hins vegar 3.833 fleiri karlar en konur flust úr landi umfram aðflutta. Hlutfall kynjanna í mannfjöldanum hefur því jafnast á nýjan leik.

Fjöldi innanlandsflutninga náði hámarki á árinu 2007 en þá voru tilkynntir flutningar 58.186 einstaklinga. Eftir það fækkaði innanlandsflutningum jafnt og þétt og náðu þeir lágmarki sínu árið 2010 þegar 46.535 einstaklingar skiptu um lögheimili. Árið 2011 varð aftur á móti fjölgun í fyrsta sinn frá árinu 2007 en þá mældust innanlandsflutningar 49.398. Flestir þeirra voru flutningar innan sveitarfélags (31.067). Alls fluttu 10.040 einstaklingar milli sveitarfélaga innan landsvæðis árið 2011 en 8.291 einstaklingur flutti frá einu landsvæði til annars.

Straumurinn til höfuðborgarsvæðis og Suðurnesja

Þegar aðeins er litið á innanlandsflutninga lá straumurinn frá öllum landsvæðum til höfuðborgarsvæðisins og Suðurnesja. Þangað fluttu alls 682 umfram brottflutta til annarra landsvæða. Hlutfallslega var flutningsjöfnuðurinn óhagstæðastur á Norðurlandi vestra og Vestfjörðum, Suðurlandi og Vesturlandi en brottfluttir til annarra landsvæða voru litlu fleiri en aðfluttir á Austurlandi og Norðurlandi eystra, segir í frétt Hagstofunnar.

Langflestir þeirra sem fluttust til útlanda komu frá höfuðborgarsvæðinu og Suðurnesjum (1.280 alls af 1.404). Fleiri fluttust til útlanda frá öðrum landsvæðum en komu, nema á Austurlandi og Vesturlandi. Þegar litið er til bæði innanlands og utanlandsflutninga var Austurland eina landsvæðið sem kom út með jákvæðan flutningsjöfnuð árið 2011 en þangað fluttu 4 fleiri en fluttu brott.