Árekstrar og umferðaóhöpp eru alltaf hvimleið. mbl.is/Jakob Fannar

Bíleigendur taka mikla fjárhagslega áhættu með því að vátryggja ekki ökutæki sín og geta lent í að borga upphæðir sem nema margföldum iðgjöldum lendi þeir í tjóni. Töluvert er um að fólk trassi að láta skoða ökutæki sín og vátryggja þau.

Í fréttaskýringu um þessi mál í Morgunblaðinu í dag segir, að samkvæmt upplýsingum frá Umferðarstofu eru 7.024 ótryggð ökutæki á ökutækjaskrá en þar af eru 4.033 á höfuðborgarsvæðinu. Þá eru alls 7.486 ökutæki á höfuðborgarsvæðinu sem áttu að koma í skoðun hinn 1. október í fyrra eða fyrr og voru því komin fram yfir skoðunarfrest hinn 1. janúar. Á landinu öllu eru alls 11.913 ökutæki komin fram yfir skoðunarfrestinn.

„Það er alltof mikið um óskoðuð og sérstaklega ótryggð ökutæki. Þegar númerin fara af vegna skoðunar er búið að vanrækja þetta mánuðum saman og fólki í rauninni ekki vorkunn,“ segir Guðbrandur Sigurðsson, aðalvarðstjóri umferðardeildar lögreglunnar á höfuðborgarsvæðinu.

Lögreglan hefur klippt númeraplötur af hundruðum óskoðaðra og ótryggðra ökutækja það sem af er mánuðinum en Guðbrandur segir að ákveðið hafi verið að leggja sérstaka áherslu á það nú í janúarmánuði. Um síðustu helgi eina og sér hafi plötur verið klipptar af 160 ökutækjum.