Kort Vegagerðarinnar er æði rauðleitt nú sídegis, þar sem margir vegir eru lokaðir vegna ófærðar og veðurs.

Eins og fram hefur komið í fréttum hér á mbl.is í dag er víða ófærð á vegum landsins og ekkert ferðaveður, sérstaklega á Vestfjörðum og Norðvesturlandi. Slæm veðurspá er fyrir kvöldið og nóttina. Þannig hefur vegunum um Súðavíkurhlíð og Eyrarhlíð verið lokað vegna snjóflóðahættu og Siglufjarðarvegur er einnig lokaður. Þá er búist við snjóflóðahættu í Ólafsfjarðarmúla og á norðanverðum Tröllaskaga.

Víðast verður mjög slæmt hríðarveður um norðvestan- og vestanvert landið í kvöld og nótt. Versnar mjög ofan til í Borgarfirði, á Bröttubrekku, Holtavörðuheiði og við Húnaflóann á milli kl. 18 og 20. Stórhríð verður og afleitt skyggni.

Suðvestanlands hvessir snemma í kvöld með áframhaldandi snjókomu annað veifið í alla nótt. Búist er við skafrenningi og þá einnig á höfuðborgarsvæðinu. Meira og minna stórhríð á Vestfjörðum og utan til á Snæfellsnesi, en tekur að lagast undir morgun. Við Eyjafjörð og norðaustanlands skánar mikið í kvöld, en versnar aftur með allhvössum NV-vindi og snjókomu snemma í fyrramálið, fyrst við Siglufjörð og Ólafsfjörð. Á sunnanverðu Snæfellsnesi má búast við vindhviðum yfir 30 m/s frá því í kvöld og fram eftir nóttu.

Vegfarendum er bent á að fylgjast mjög vel með veðurspám og upplýsingum um færð og veður frá Vegagerðinni. Einnig er hægt að hringja í upplýsingasímann 1777.