Siglufjörður. mats.is

Siglufjarðarvegi hefur verið lokað vegna snjóflóða en búist er við snjóflóðahættu í Ólafsfjarðarmúla og á norðanverðum Tröllaskaga í dag.

Líkt og fram hefur komið hefur verið lýst yfir hættustigi á Súðavíkurhlíð  og er vegurinn því lokaður. Hætta er talin á að snjóflóð falli víða á vegum á Vestfjörðum í dag miðað við veðurspá.

Samkvæmt upplýsingum frá veðurfræðingi Vegagerðarinnar er stórhríð og NA 18-23 m/s á norðanverðum Vestfjörðum í dag.  Færist smámsaman suður á bóginn og nær til Breiðafjarðar og Stranda um hádegi.  Þétt snjókoma víða norðanlands, en þar tekur ekki að hvessa að ráði fyrr en um og upp upp úr miðjum degi. Fyrst vestantil á Norðurlandi.

Það er hálka á Sandskeiði, Hellisheiði og í Þrengslum.  Á Suðurlandi er snjóþekja og  hálka og sumstaðar éljagangur.

Snjóþekja og snjókoma eru á Reykjanesbraut og Grindavíkurvegi og hálkublettir á Vesturlandsvegi. Þæfingsfærð er á Suðurstrandarvegi en þungfært á Krýsuvíkurvegi.

Hálka og snjóþekja er á flestum vegum á Vesturlandi. Þæfingsfærð er á Útnesvegi en ófært í Álftafirði.

Á Vestfjörðum er þungfært og þæfingsfærð víða. Ófært er á Gemlufallsheiði, Klettshálsi, Kleifaheiði, Hálfdán og Mikladal. Ófært og stórhríð er á Súðavíkurhlíð, í Önundar- og Súgandarfirði og Ísafjarðardjúpi. Þæfingsfærð er á Eyrarhlíð. Þungfært og skafrenningur er á Steingrímsfjarðarheiði. Snjóþekja og éljagangur er á Þröskuldum.

Á Norðurlandi vestra er hálka, snjóþekja og snjókoma. Hálka er á Öxnadalsheiði.

Á Norðausturlandi er hálka, snjóþekja, skafrenningur og víðast hvar snjókoma. Þæfingsfærð og snjókoma er á Hólasandi.
Flughálka er á milli Kelduhverfis og Raufarhafnar að Vopnafirði.

Á Austurlandi er snjóþekja, hálka og snjókoma.

Á Suðausturlandi er snjóþekja.