Eldri borgarar og öryrkjar hafa lengi barist fyrir réttindum sínum. mbl.is/Ómar

Fulltrúar Öryrkjabandalagsins í starfshópi um endurskoðun almannatryggingalaga, sem velferðarráðherra skipaði á síðasta ári, ætla ekki að koma aftur til samstarfs við hópinn fyrr en gengið er að kröfum þeirra.

Ekki er um formlega úrsögn að ræða og munu fulltrúarnir áfram fylgjast með framvindu mála. Fulltrúarnir, Sigríður Hanna Ingólfsdóttir og Garðar Sverrisson, gengu af fundi hópsins 13. janúar eftir að hafa lagt fram bókun þess efnis að Öryrkjabandalagið (ÖBÍ) myndi ekki taka þátt í þeirri vinnu sem fram færi í hópnum á meðan ekki væri tekið tillit til sjónarmiða bandalagsins.

Krafa ÖBÍ er að stjórnvöld skili öryrkjum sem fyrst því sem þeim ber samkvæmt lögum um almannatryggingar áður en hugað verður að uppstokkun á núverandi bótakerfi. Þeir vilja að frítekjumörk og tekjuviðmið verði leiðrétt og þær skerðingar sem voru settar á um mitt ár 2009 dregnar til baka. „Án leiðréttinga í þá veru er ábyrgðarlaust af hálfu ÖBÍ að taka frekari þátt í vinnu við svonefnda endurskoðun almannatryggingalaga, enda sé henni augljóslega ætlað að festa í sessi þær alvarlegu skerðingar sem stjórnvöld hafa kosið að láta öryrkja bera,“ segir í bókuninni.

Í umfjöllun um mál þetta í Morgunblaðinu í dag er Lilja Þorgeirsdóttir, framkvæmdastjóri ÖBÍ, ekki bjartsýn á að hlustað verði á þessar kröfur. „Við viljum að lög um almannatryggingar verði endurskoðuð en ekki eins og vinnan fer nú fram. Við höfum tekið virkan þátt í starfi nefndarinnar frá því í maí í fyrra og teljum fullreynt að ná okkar sjónarmiðum í gegn innan starfshópsins.“