Súðavíkurhlíð mynd/Halldór

Stórhríð er á norðanverðum Vestfjörðum en eins og fram hefur komið var óvissustigi lýst yfir vegna hugsanlegrar snjóflóðahættu á norðanverðum Vestfjörðum og mið-Norðurlandi í hádeginu í dag.

Óvissustigi er lýst yfir þegar afla þarf frekari upplýsinga um atburði sem leitt geta til þess að öryggi fólks og byggðar sé ógnað. Athuganir, rannsóknir, vöktun og mat er aukið á þeim svæðum sem óvissa ríkir um.

Siglufjarðarvegur er lokaður vegna snjóflóða. Hættustigi var  lýst yfir á Súðavíkurhlíð kl. 12 í dag og er vegurinn því lokaður. Búast má við snjóflóðahættu víða á vegum á Vestfjörðum í dag miðað við veðurspá. Eins er búist við snjóflóðahættu í Ólafsfjarðarmúla og á norðanverðum Tröllaskaga í dag.

Það er hálka á Sandskeiði og hálka og snjókoma á Hellisheiði og í Þrengslum.  Á Suðurlandi er snjóþekja og  hálka og sumstaðar éljagangur.

Hálka og éljagangur er á Reykjanesbraut og Grindavíkurvegi og hálkublettir á Vesturlandsvegi. Þæfingsfærð er á Suðurstrandarvegi en þungfært á Krýsuvíkurvegi.

Hálka og snjóþekja er á flestum vegum á Vesturlandi. Þæfingsfærð er á Útnesvegi en ófært í Álftafirði.

Á Vestfjörðum er þungfært og þæfingsfærð víða. Vegurinn um Súðavíkurhlíð er lokaður. Ófært er á Gemlufallsheiði, Klettshálsi, Kleifaheiði, Hálfdán og Mikladal. Ófært og stórhríð er í Önundar- og Súgandarfirði, Ísafjarðardjúpi og á Steingrímsfjarðarheiði. Þæfingsfærð er á Eyrarhlíð. Snjóþekja og éljagangur er á Þröskuldum.

Á Norðurlandi vestra er hálka, snjóþekja og snjókoma. Snjóþekja og skafrenningur er á Vatnsskarði og hálka á Öxnadalsheiði. Siglufjarðarvegur er lokaður.

Á Norðausturlandi er hálka, snjóþekja, skafrenningur og víðast hvar snjókoma. Þæfingsfærð og snjókoma er á Hólasandi.
Flughálka er á milli Þórshafnar og Bakkafjarðar og í kringum Vopnafjörð.

Á Austurlandi er snjóþekja, hálka og snjókoma. Á Suðausturlandi er hálka og snjóþekja.