mbl.is/Golli

Vegagerðin segir að Hellisheiði verði lokuð um óákveðinn tíma. Þá hefur hættustigi verið lýst yfir á Súðavíkurhlíð og Eyrarhlíð á Vestfjörðum. Eru þessar leiðir lokaðar. Einnig er lokað vegna snjóflóðahættu í Ólafsjarðarmúla og á Siglufjarðarvegi.

Þæfingsfærð og skafrenningur er á Reykjanesbraut og Grindavíkurvegi. Þungfært er á flestum öðrum leiðum á Reykjanesi.

Þæfingsfærð og skafrenningur er á Sandskeiði og í Þrengslum. Þungfært og skafrenningur er á öllum leiðum á Suðurlandi en þó er þæfingsfærð og skafrenningur á milli Selfoss og Hvolsvallar. Flughálka er svo á milli Þorlákshafnar og Stokkseyrar og svo frá Eyrarbakka að Selfossi. Þungfært og óveður er undir Eyjafjöllum.

Á Vesturlandi er þungfært í Svínadal en hálka og skafrenningur í kringum Búðardal. Ófært er á Bröttubrekku. Hálka og skafrenningur á Holtavörðuheiði. Snjór og stórhríð er í Borgarfirði. Hálka og skafrenningur er svo á flestum leiðum á Snæfellsnesi en þó er ófært á Fróðárheiði en mokstur stendur yfir.

Á Vestfjörðum eru allar leiðir ófærar, þó er byrjað að moka á milli Ísafjarðar og Þingeyrar og á nokkrum leiðum á sunnanverðum Vestfjörðum.

Á Norðurlandi vestra er hálka eða snjór og skafrenningur á flestum leiðum. Þæfingsfærð og stórhríð er á Þverárfjalli og öllum leiðum í kringum Sauðárkrók. Ófært er frá Hofsósi út á Siglufjörð.

Á Norðurlandi er ófært í Ólafsfjarðarmúla. Þæfingsfærð og skafrenningur er á milli Dalvíkur og Akureyrar. Hálka eða snjór og éljagagnur er á flestum öðrum leiðum.

Á Austurlandi og Suðausturlandi er hálka eða snjór á flestum leiðum.

Ábending frá veðurfræðingi
Suðvestanlands og vestanlands verður áfram allhvass vindur með skafrenningi fram á morguninn, en lagast síðan smám saman. Á Vestfjörðum lagast veður mikið þegar líður á morguninn, en á sama tíma fer það versnandi í Skagafirði og Eyjafirði og þar er hríðarveður og skafrenningur.