Mikið hefur snjóað um allt land að undanförnu./Mynd úr safni mbl.is/Hafþór Hreiðarsson

„Það gengur hægt að moka. Við erum búnir að hreinsa Skutulsfjarðarbrautina og út í Hnífsdal. Svo erum við búnir að stinga í gegn á Þingeyri,“ segir Jón Baldvin Hólmar, verkstjóri hjá Vegagerðinni á Ísafirði, en bendir á að enn sé þó mjög þungfært um veginn til Þingeyrar.

Að sama skapi er unnið að því að opna veginn að Flateyri og Súganda. „Það er verið að vinna að því að moka en það gengur hægt. Það er mjög mikill snjór.“ Vegurinn um Bolungarvík er nú orðinn fær bifreiðum sem búnar eru undir vetrarakstur.

Unnið er að mokstri í Súðavíkurhlíð en að sögn Jóns Baldvins hafa mörg snjóflóð fallið á svæðinu og því gengur moksturinn hægt.

Þá féll snjóflóð á veginn um Kirkjubólshlíð og er nú unnið að mokstri. „Það er verið að vinna í því en það tekur dálítinn tíma.“

Jón Baldvin segir sum snjóflóð sem fallið hafa vera um tveir metrar á hæð en ekki liggja fyrir tölur um breidd flóðanna. Segir hann erfitt að mæla hve breið þau eru m.a. sökum þess hve mikið hefur snjóað og skafið á svæðinu.

Um þessar mundir eru alls 11 tæki sem vinna að snjómokstri og hálkuvörnum fyrir Vegagerðina á Ísafirði.