Ófærð mbl.is/Rax

Lögreglan á Suðurnesjum hefur fengið nálægt 150 hjálparbeiðnir í nótt vegna fólks sem komst ekkert vegna ófærðar. Björgunarsveitir voru að í alla nótt. Hjálparbeiðnir eru aftur byrjaðar að streyma inn vegna fólks sem er á leið til vinnu en lögreglan ráðleggur fólki að halda sig heima í dag vegna ófærðar á götum bæjarins. Ófært er frá Reykjanesbæ út í Garð og Sandgerði.

Búið er að opna Reykjanesbraut í aðra áttina frá Hafnarfirði til Keflavíkur en ekki búið að hleypa umferð á frá Keflavík til Hafnarfjarðar.  Mikill skafrenningur er með norðvestan 15 metrum á sekúndu. Að sögn lögreglu er Vegagerðin að vinna að því að finna stórvirkari tæki og vinnuvélar til að opna.

Fréttir af millilandaflugi áttu að berast kl. 7 en þar er allt í seinkun og margir strandaglópar í Flugstöðinni á Keflavíkurflugvelli. Milli 25 og 30 manns sem komust ekki til Reykjavíkur gistu í skóla í Reykjanesbæ í nótt.

Fram kemur í tilkynningu frá Vegagerðinni að búið sé að opna Reykjanesbraut í aðra áttina frá Hafnarfirði til Keflavíkur en ekki búið að hleypa umferð á frá Keflavík til Hafnarfjarðar.

Sandskeið, Hellisheiði og Þrengslin verða lokuð um óákveðin tíma vegna færðar og veðurs.

Þá er hættustigi lýst yfir á Súðavíkurhlíð og Eyrarhlíð og eru þessar leiðir því lokaðar.

Flestir vegi á Vestfjörðum eru ófærir. Ólafsfjarðarmúli og Siglufjarðarvegur eru lokaðir vegna snjóflóða.

Búast má við snjóflóðahættu víða á vegum á Vestfjörðum í dag miðað við veðurspá.
Eins er búist við snjóflóðahættu í Ólafsfjarðarmúla og á norðanverðum Tröllaskaga í dag.

Vonskuveður er enn á Vestfjörðum, Vesturlandi og Suðurlandi og lítið ferðaveður.
Í öðrum landshlutum er verið að kanna ástand og hreinsa vegi og nánari upplýsing koma fljótlega.

Ábending frá veðurfræðingi
Suðvestanlands og vestanlands verður áfram allhvass vindur með skafrenningi fram á morguninn, en lagast síðan smámsaman.  Á Vestfjörðum lagast veður mikið þegar líður á morguninn, en á sama tíma fer versnandi í Skagafirði og Eyjafirði og þar verður hríðarveður og skafrenningur.