Slæm færð á höfuðborgarsvæðinu getur hindrað slökkvilið við störf mbl.is/Kristinn Ingvarsson

Að fenginni reynslu starfsmanna slökkviliðs höfuðborgarsvæðisins af sjúkraflutningum og slökkvistarfi á undanförnum vikum vilja þeir hvetja almenning til að hjálpast að við að takast á við þær erfiðu aðstæður sem skapast hafa á svæðinu vegna ófærðar.

Afar mikilvægt er að tryggja sem besta aðkomu að heimahúsum og fyrirtækjum til að greiða fyrir sjúkraflutningum og öðrum störfum viðbragðsaðila, draga úr slysahættu og greiða götu þeirra sem eiga erfitt með að komast leiðar sinnar.

Snjómokstur er hins vegar ekki á allra færi og því ríður á að þeir sem vettlingi geta valdið bjóði samborgurum aðstoð sína. Þeir sem til þess hafa burði geta gert mikið gagn með því að moka snjó hjá sér og öðrum, hreinsa heimreiðar eftir megni, moka og sópa snjó úr tröppum, eyða hálku og fjarlægja grýlukerti þar sem þau geta valdið slysahættu.

Einnig er vert að horfa til þeirra sem ekki hafa burði til þessara verka og hjálpa þeim með dagleg verkefni sem reynast þeim erfið í slæmri færð, svo sem að kaupa í matinn o.fl.

Slökkviliðið biður einnig fólk að leggja ekki bílum þannig að þeir hindri sjúkraflutningamenn og aðra í störfum sínum. Einnig er ástæða til að hvetja bílstjóra til að hreinsa vel snjó og ís af bílum sínum þannig að þeir hafi óskert útsýni og valdi ekki óþarfa hættu í umferðinni.

Slökkviliðið vekur athygli á að Veðurstofan gerir ráð fyrir rigningu og hlýnandi veðri á næstu dögum. Verulega má draga úr slysahættu af völdum hálku með því að hreinsa snjó við heimahús og fyrirtæki. Jafnframt er mikilvægt að hreinsa frá niðurföllum og gera ráðstafanir til að koma í veg fyrir vatnstjón þar sem það á við, segir í tilkynningu frá slökkviliðinu.