mbl.is/Skapti

Vegurinn um Víkurskarð er lokaður um óákveðinn tíma vegna umferðaróhapps. Vegna veðurs verður Hellisheiði lokuð um óákveðinn tíma, segir Vegagerðin.

Hættustigi var lýst yfir á Súðavíkurhlíð og er hún því lokuð. Einnig er lokað vegna snjóflóðahættu í Ólafsfjarðarmúla og á Siglufjarðarvegi.

Færð og aðstæður
Þæfingsfærð og skafrenningur er á Reykjanesbraut og Grindavíkurvegi. Þungfært er á flestum öðrum leiðum á Reykjanesi.

Þæfingsfærð og skafrenningur er á Sandskeiði og í Þrengslum. Þæfingsfærð og skafrenningur er á flestum leiðum á Suðurlandi.  Flughálka er á milli Þorlákshafnar og Stokkseyrar og svo frá Eyrarbakka að Selfossi. Þungfært og óveður er undir Eyjafjöllum.

Á Vesturlandi er snjóþekja eða hálka og skafrenningur á flestum leiðum. Ófært er á Bröttubrekku, Fróðárheiði og á Útnsvegi.

Á Vestfjörðum eru margar leiðir ófærar þó er byrjað að moka á flestum leiðum milli Ísafjarðar og Þingeyrar og á nokkrum leiðum á sunnanverðum Vestfjörðum.

Á Norðurlandi vestra er hálka eða snjóþekja og skafrenningur á flestum leiðum. Þæfingsfærð er á Þverárfjalli og öllum leiðum í kringum Sauðárkrók. Ófært er frá Hofsósi út á Siglufjörð.

Á Norðurlandi er ófært í Ólafsfjarðarmúla. Þæfingsfærð og skafrenningur er á milli Dalvíkur og Akureyrar og á Víkurskarði. Hálka eða snjóþekja og éljagangur er á flestum öðrum leiðum.

Á Austurlandi og Suðausturlandi er hálka eða snjóþekja á flestum leiðum.

Ábending frá veðurfræðingi
Suðvestanlands og vestanlands verður áfram allhvass vindur með skafrenningi fram á morguninn, en lagast síðan smámsaman.  Á Vestfjörðum lagast veður mikið þegar líður á morguninn, en á sama tíma fer veður versnandi í Skagafirði og Eyjafirði og þar er hríðarveður og skafrenningur.