Ásta Ragnheiður Jóhannesdóttir á forsetastóli Alþingis. mbl.is/Kristinn

„Þarna staðfestir hún það sem hefur ítrekað komið fram að ákvörðun mín var rétt og byggð á lögum og mér bar að sjálfsögðu að fara að lögunum. Og þessa ákvörðun tók ég að mjög vandlega athuguðu máli.“

Þetta segir Ásta Ragnheiður Jóhannesdóttir, forseti Alþingis í Morgunblaðinu í dag, spurð um þau ummæli Sigríðar J. Friðjónsdóttur, saksóknara Alþingis, á fundi stjórnskipunar- og eftirlitsnefndar þingsins í gærmorgun, að Alþingi hefði ákæruvaldið í landsdómsmálinu gegn Geir H. Haarde, fyrrverandi forsætisráðherra, og gæti hvenær sem er kallað ákæruna á hendur honum til baka fram að því að dómur yrði kveðinn upp.

Ásta Ragnheiður hefur verið gagnrýnd af ýmsum undanfarna daga, ekki síst innan úr eigin flokki, Samfylkingunni. Gagnrýnin beindist að henni fyrir þá ákvöðun að samþykkja að setja á dagskrá Alþingis þingsályktunartillögu Bjarna Benediktssonar, formanns Sjálfstæðisflokksins, um að draga landsdómsákæruna gegn Geir til baka. Ennfremur fyrir að greiða síðan atkvæði gegn því að henni yrði vísað frá í atkvæðagreiðslu sem fram fór í þinginu á föstudaginn fyrir viku.