Þrengslin er opin Morgunblaðið/RAX

Opnað hefur verið fyrir bílaumferð um Þrengslin en Hellisheiði er enn lokuð. Vegfarendum er sérstaklega bent á að ekki er útlit fyrir að veður taki að lagast fyrr en vindur gengur niður undir kvöld.

Vegurinn um Þrengslin er nú fær öllum bílum og hálkulaus á köflum.

Mikill fjöldi ökumanna lenti í vandræðum á Hellisheiði í dag en samkvæmt upplýsingum frá Slysavarnafélaginu Landsbjörg er talið að björgunarsveitafólk hafi þurft að aðstoða ökumenn 60 bifreiða. Landsbjörg sendi hátt í 80 björgunarsveitamenn úr sveitum af höfuðborgarsvæðinu, Hveragerði og Eyrarbakka.

Samkvæmt upplýsingum frá Landsbjörg er aðgerðum sveitanna að ljúka og menn Landsbjargar á leið af heiðinni.

Unnið að snjómokstri á Hellisheiði

Starfsmenn Vegagerðarinnar vinna nú að snjómokstri á heiðinni en veður er mjög slæmt, mikill vindur og skafrenningur. Undir kvöld er búist við því að vindur gangi niður og standa vonir til að hægt verði að opna fyrir bílaumferð í kvöld.

Færð á vegum

Í tilkynningu frá Vegagerðinni kemur m.a. fram að flestar aðalleiðir á Suðurlandi eru nú færar en þó er þæfingsfærð á Mosfellsheiði og skafrenningur. Sumstaðar er þungfært á fáfarnari sveitavegum en flughált er undir Eyjafjöllum.

Reykjanesbraut er nú greiðfær en Suðurstrandarvegur ófær.

Þá er Fróðárheiði ófær og eins Útnesvegur. Óveður er á norðanverðu Snæfellsnesi.

Á Vestfjörðum er ófært frá Vatnsfirði og austur yfir Klettsháls og verður ekki opnað í dag þar sem veður er orðið vont.

Lokað er á Raknadalshlíð vegna snjóflóðahættu og ófært er á Kleifaheiði. Flughált er í Bæjarhreppi.

Á Norðurlandi er víðast hvar hálka eða snjór.

Hálka eða snjór er á flestum vegum á Austurlandi og Suðausturlandi en varað er við flughálku úr Öræfum og vestur undir Eyjafjöll.