Hálka er víða um landið. Ófærð og vont veður geta stuðlað að slysum. mbl.is/Golli

Vegagerðin bendir á að almennt fer hlýnandi og því hlánar á láglendi um suðvestan- og vestanvert landið, og í kvöld og nótt einnig norðan- og norðaustantil.  Um leið og blotnar verða vegir þá víða flughálir. Þrengslin eru opin en Hellisheiðin er enn lokuð.

Hellisheiði er enn lokuð en flestar aðrar aðalleiðir á  Suðurlandi eru færar. Þó er flughált á Mosfellsheiði en víða er nokkur hálka og þungfært á örfáum sveitavegum.

Greiðfært er á Reykjanesbraut en ófært á Suðurstrandarvegi og Krýsuvíkurvegi.

Hringvegurinn  er auður frá Reykjavík upp Borgarfjörð en annars er víðast hvar hálka á Vesturlandi. Þæfingsfærð er á Holtavörðuheiði og skafrenningur.  Fróðárheiði er ófær.
Á Vestfjörðum er  ófært  milli Patreksfjarðar og Bíldudals,  vegur er lokaður innan við Patreksfjörð vegna snjóflóðahættu og Kleifaheiði er ófær. Eins er ófært  frá Vatnsfirði og austur yfir Klettsháls.   Það er flughált frá Ísafirði til Súðavíkur og inn allt Djúp.  Flughált er einnig í Gufudalssveit og á Innstrandarvegi.

Á Norðurlandi er víðast hvar hált. Búast má við snjóflóðahættu á Siglufjarðarvegi utan Fljóta með hlýnandi veðri. Flughált er á Þverárfjalli og nokkuð víða í Skagafirði. Flughált er einnig  á Öxnadalsheiði.  Þæfingsfærð er á Hálsum.

Hálka eða snjóþekja er á flestum vegum á Austurlandi  en flughált er að heita má á öllu Suðausturlandi.