Meðal annars er staðið fyrir sushigerðarkennslu á Japanshátíð í Háskóla Íslands. mbl.is/Kristinn

Í dag iðar allt af lífi á Háskólatorgi Háskóla Íslands því þar er nú haldin svokölluð Japanshátíð. Þetta er í áttunda sinn sem efnt er til hátíðarinnar en hún er samvinnuverkefni sendiráðs Japans á Íslandi og nemenda í japönsku máli og menningu á hugvísindasviði Háskóla Íslands.

Á hátíðinni eru kynntir ýmsir krókar og kimar japanskrar menningar, en meðal annars verður á boðstólum karókísöngur, sushigerðarkennsla auk kynningar á japönskum bókmenntum og kvikmyndum.

Japönskunemarnir, sem eru alls 60 talsins, hafa undirbúið hátíðina vikum saman en hún er nú orðin árlegur viðburður og sækir hana fjöldinn allur af áhugamönnum um japanska menningu.

Félagsskapur fólks af japönskum uppruna á Íslandi hefur lagt hönd á plóg og stendur meðal annars fyrir japanskri teathöfn og japönskum blómaskreytingum (ikebana). Þar að auki munu ýmis félög vera með sýningu á budo (bardagaíþróttum).

Hátíðin er einnig nýtt til kynningar á námi í japönsku og ýmsum skólastyrkjum tengdum náminu. Auk þess er skiptinám við japanska háskóla kynnt. Auk þessa verður hægt að nálgast upplýsingar um Íslensk-Japanska félagið og Félag japansmenntaðra á Íslandi.

Hátíðin hefst kl. 13 á Háskólatorgi og lýkur kl. 17. Hún er öllum opin.

Hægt er að nálgast nánari upplýsingar um hátíðina hér.