Það kólnar væntanlega í kvöld og þá er hætta á hálku mbl.is/Kristinn Ingvarsson

Kólnar og léttir til þegar líður á daginn um landið vestanvert og í kvöld austantil.  Víða myndast varasöm ísing á blautum vegunum þegar frystir, samkvæmt upplýsingum frá veðurfræðingi Vegagerðarinnar.

Hálkublettir eru á Lyngdalsheiði og víða í uppsveitum á Suðurlandi. Þoka er á Hellisheiði en annars er hún greiðfær ásamt flestum aðalleiðum.

Vestanlands er víðast hvar orðið autt en þó er einhver hálka eða hálkublettir á örfáum útvegum eins og í Staðarsveit á Snæfellsnesi.
Á Vestfjörðum er flughált á Steingrímsfjarðarheiði og milli Brjánslækjar og Klettsháls. En annars hálka eða hálkublettir mjög víða en þó er ófært yfir Vatnsfjarðarháls í Ísafjarðardjúpi.

Á Norðurlandi er þjóðvegur 1 orðinn greiðfær en þó er einhver hálka eða hálkublettir víða á útvegum og á norðausturhorninu.

Áframhaldandi hálkublettir eru svo nokkuð víða á Austurlandi og jafnvel flughált á nokkrum stöðum.