mbl.is/Árni Sæberg

Katrín Jakobsdóttir, sagði á Alþingi í dag að nýtt frumvarp um Ríkisútvarpið ohf. verði væntanlega kynnt í næstu viku. Sagði Katrín á Alþingi í dag að markmið frumvarpsins væri m.a. að efla sjálfstæði Ríkisútvarpsins.

Þetta kom fram í fyrirspurnartíma en Siv Friðleifsdóttir, þingmaður Framsóknarfokks, sagðist hafa setið aðalfund Ríkisútvarpsins ohf. í morgun þar sem Katrín boðaði þetta frumvarp. Þá hefði einnig komið fram að sú stofnun stæði mjög traustum fótum þrátt fyrir mikinn niðurskurð í rekstrinum.

Siv vísaði í frétt DV um að Vinstri grænir vildu meira eftirlit með RÚV og kvartað væri undan því að menntamálaráðherra gæti ekki beitt eigendavaldi til að hafa áhrif á stofnunina.  „Er ekki kominn tími til að þessi stofnun fái nú frið til að sinna því góða starfi sem hún hefur sinnt upp á síðkastið," sagði Siv og sagðist  ekki vilja endurreisn gamla útvarpsráðsins, sem var með puttana í fréttum Ríkisútvarpsins.

Katrín sagðist hafa séð frétt DV og ekki áttað sig á innihaldi hennar og hvernig aukið eftirlit með RÚV ætti að fara fram „en myndin af mér sem fylgdi með var mjög ógnvekjandi," sagði hún.

Katrín sagði að nýja frumvarpið snérist um að efla starfsemi Ríkisútvarpsins og tryggja fjárhagslegt sjálfstæði þess, m.a. með því að marka því á ný ákveðinn tekjustofn í stað þess að að stofnunin fái framlag á fjárlögum.

„Það er hins vegar rétt, að ætlunin er að skýra í frumvarpinu hlutverk og verksvip stjórnar," sagði Katrín. Hún sagði að ekki væri lagt til að gerðar yrðu grundvallarbreytingar á formi félagsins en skýra ýmsa hluti betur. Uppi væru hugmyndir um að Alþingi skipi ekki beint í stjórn RÚV heldur skipi sérstaka valnefnd sem skipar síðan stjórnina. Slíkt fyrirkomulag væri m.a. í  Noregi. 

Siv sagði að ráðherra hefði sagt að breyta eigi hlutverki stjórnar RÚV „og þar stendur hnífurinn í kúnni. Nú eru í stjórn RÚV fulltrúar frá flokkunum og þeir eru að standa sig held ég ágætlega en ég held að almenningur vilji ekki breyta hlutverki stjórnar RÚV þannig að það verði meiri pólitísk afskipti af stofnuninni," sagði Siv.

Katrín sagði að ekki væri ætlunin að dagskrárvald færist til stjórnar RÚV heldur verði það áfram á hendi útvarpsstjóra.