Byggingar rísa við Skúlagötu.

Flestir þeir sem fengu aðvaranir eða athugasemdir í sameiginlegu átaki ríkisskattstjóra, ASÍ og SA í fyrra til að sporna við svartri atvinnustarfsemi o.fl., brugðust vel við og lofuðu að koma málum í eðlilegt horf.

Á þessu voru þó nokkrar undantekningar skv. upplýsingum Skúla Eggerts Þórðarsonar ríkisskattstjóra. Fram hefur komið að til stendur að halda þessu átaki áfram á yfirstandandi ári en í fyrra voru á þriðja þúsund starfsstöðvar heimsóttar.

Niðurstöður átaksins bentu til þess að vantaldir skattar, gjöld og tekjur sem ekki skila sér til réttra aðila og tengjast svartri vinnu séu á ársgrunni 13,8 milljarðar króna meðal fyrirtækja sem eru með veltu undir 1 milljarði króna á ári.

Í skýrslu um niðurstöðurnar segir að til þess að stærsti hlutinn af þessari fjárhæð skili sér þurfi eftirlitsaðilar virkari úrræði.