Þá er það komið á hreint: Í Reykjavík voru 24 alhvítir dagar í janúar og er það 12 dögum meira en að meðaltali 1961 til 1990, en 9 dögum meira en að meðaltali 1971 til 2000. Alhvítir dagar hafa ekki verið fleiri í janúar í Reykjavík síðan 1993 en þá voru þeir 27. Á Akureyri voru alhvítu dagarnir 21 og er það í meðallagi. Þetta kemur fram í yfirliti Veðurstofunnar á tíðarfari í janúar.

Alhvítir dagar í Reykjavík voru 23 í janúar 1995 og 2005. Að magni til er snjórinn í janúar einnig sá mesti í janúar frá 1993 og aðeins 5 sinnum hefur snjór verið meiri í janúar frá því að samfelldar mælingar á snjódýpt ásamt mati á snjóhulu hófust í Reykjavík árið 1921.

Aldrei meiri snjóþyngsli í janúar og desember

Sé einnig litið til annarra almanaksmánaða er það einungis í febrúar árið 2000 að snjómagn var svipað og nú, eftir 1993. Séu mánuðirnir tveir, desember og janúar teknir saman kemur í ljós að aldrei hafa snjóþyngsli orðið samtals jafnmikil í mánuðunum tveimur og nú. Aðeins tvö önnur mánaðapör skáka því snjómagni sem nú hefur gengið yfir í Reykjavík, það eru janúar og febrúar 1984 og febrúar og mars 1989. Febrúar og mars 2000 eru ekki langt undan. Hafa verður í huga að mælt hefur verið á nokkrum stöðum í bænum og alls ekki er víst að mæliaðstæður séu sambærilegar í raun.

Á Akureyri voru alhvítu dagarnir 21 og er það í meðallagi.

Snjóþungt var um landið sunnan- og vestanvert í janúarmánuði og sömuleiðis var mikill snjór á Vestfjörðum norðanverðum og sums staðar norðanlands. Olli snjórinn ýmiss konar vandræðum, ekki síst vegna þess að mikil svellalög sem fylgdu kulda og snjó í desember tók seint og illa upp. Óttast margir kal í vor og sumar.

Mánuðurinn telst í heildina úrkomu- og illviðrasamur um meginhluta landsins. Suðvestanlands var venju fremur snjóþungt og sömuleiðis var allmikill snjór á Vestfjörðum og sums staðar norðanlands. Hiti var ofan við meðallag um land allt, mest austanlands.

Meðalhiti í Reykjavík mældist 0,4 stig og er það um 1,0 stigi ofan við meðallag áranna 1961 til 1990 en 0,5 stigum undir meðallagi áranna 2001 til 2010. Á Akureyri var meðalhitinn 0,3 stig og er það 2,4 stigum ofan meðallags. Á Höfn í Hornafirði var meðalhitinn 1,7 stig og -4,4 stig á Hveravöllum, 2,3 stigum ofan meðallags. Meðalhita á fleiri stöðvum má sjá í töflu, þar má einnig sjá röð hita mánaðarins frá þeim hlýjasta talið.

Hæsti meðalhiti mánaðarins mældist í Surtsey 3,4 stig en þar á eftir á Vattarnesi 2,7 stig. Lægstur var meðalhitinn í Sandbúðum á Sprengisandsleið -5,8 stig en næstlægstur á Brúarjökli -5,3 stig. Lægstur var meðalhiti í byggð í Möðrudal, -3,6 stig.

Hæsti hiti mánaðarins mældist á Skjaldþingsstöðum þ. 29., 15,6 stig, sama dag mældist hámarkshiti 15,2 stig á sjálfvirku stöðinni á Siglufirði. Lægsti hiti mánaðarins mældist á Brú á Jökuldal, -22,6 stig hinn 27. Lægsta lágmark á mannaðri stöð mældist á Torfum í Eyjafirði sama dag, -17,5 stig.

Mjög úrkomusamt var á Suður- og Vesturlandi og úrkoma var einnig ofan við meðallag víðast hvar fyrir norðan. Einna minnst að tiltölu var úrkoman austast á landinu en þar var hún nærri meðallagi.

Í Reykjavík mældist úrkoman 144,6 mm og er það 90 prósent umfram meðallag, í Stykkishólmi var úrkoman einnig um 90 prósent umfram meðallag janúarmánaðar. Úrkoma á Akureyri mældist 72,7 mm og er það um 30 prósent umfram meðallag.´

Úrkomumet á Grímsstöðum

Úrkoma á Stórhöfða í Vestmannaeyjum mældist 314,4 mm. Þar hefur verið mælt samfellt frá 1921 og hefur aldrei mælst meiri úrkoma í janúar en nú. Áður var mælt í kaupstaðnum frá 1881 og þar mældist heldur aldrei meiri úrkoma í janúar en nú. Endanlegt uppgjör liggur ekki fyrir á fleiri stöðvum en svo virðist sem ekki hafi mælst meiri úrkoma Í Vík í Mýrdal í janúar síðan 1950. Á Grímsstöðum á Fjöllum hefur aldrei mælst meiri úrkoma í janúar heldur en nú – ekki þó staðfest. Fáeinar aðrar stöðvar eru nærri fyrri metúrkomu eða rétt yfir henni, af þeim sem lengi hafa athugað má í þeim flokki nefna Hraun á Skaga og Írafoss, en Eyrarbakka vantar lítið upp á met.