Reuters

Nokkrir dagar eru í að Persónuvernd sendi frá sér álit um hvort lýtalæknar megi senda frá sér persónugreinanlegar upplýsingar um allar konur sem farið hafa í brjóstastækkunaraðgerðir.

Samkvæmt upplýsingum frá Persónuvernd hefur stofnunin beðið um viðbótarupplýsingar frá Læknafélagi Íslands sem snúast um hvort félagið er að leita eftir formlegum úrskurði eða leiðbeinandi upplýsingum. Ennfremur þarf stofnunin að kalla eftir upplýsingum frá embætti landlæknis. Þegar þessar upplýsingar hafa skilað sér mun stofnunin senda frá sér niðurstöðu, en það verður ekki í þessari viku og tæplega í næstu viku. Mikið álag er á Persónuvernd, en reynt er þó að flýta afgreiðslu þessa máls.

Í yfirlýsingu sem Læknafélagið sendi frá sér segir að félagið hafi leitað leiðbeininga Persónuverndar vegna kröfu landlæknis um upplýsingarnar og þá staðreynd að svo virðist sem búa eigi til persónugreinanlega skrá með nöfnum allra kvenna sem gengist hafa undir brjóstastækkunaraðgerð frá 1. janúar 2000 til ársloka 2011.

Benda læknar á að þeir telji lagaheimildir landlæknis til persónugreinanlegra upplýsinga fyrir gildistöku laga um landlækni og lýðheilsu vera óskýrar.