Melaskóli. mbl.is/Júlíus

Skólayfirvöld í Melaskóla í Reykjavík hafa upplýst öll börn í 5.-7. bekk skólans og forráðamenn allra barna í skólanum um atvik sem átti sér stað í frímínútum elstu bekkinga í gær. Þá gekk einn nemandi um skólalóðina og ógnaði nærstöddum með hnífi. Engan sakaði.

Samkvæmt upplýsingum mbl.is voru starfsmenn skólans fljótir að átta sig og var brugðist við með því að hafa samband við lögreglu og kalla nemendur inn í hús. Í framhaldinu var haft samband við foreldra nemandans sem ógnaði nærstöddum og er málið nú komið í hendur barnaverndaryfirvalda. 

Skólayfirvöld líta málið grafalvarlegum augum en svona atvik heyra til algjörra undantekninga. Viðbragðsteymi er að störfum skólanum sem bregst strax við öllum þeim vandamálum sem koma upp.

Börn í 1.-4. bekk skólans urðu ekki vitni að atburðinum. Skólayfirvöld ákváðu því að ræða ekki sérstaklega við þau um málið. Börnin hafa hins vegar spurt kennara og starfsmenn skólans um atvikið. Öllum spurningum er svarað og börnin fullvissuð um að þeim sé óhætt og að það sé ekkert að óttast.

Sem fyrr segir voru allir foreldrar og forráðamenn upplýstir um málsatvik í bréfi sem skólinn sendi þeim í gær.