Það er illa séð að fara skítugur í laugina á Íslandi. Rax / Ragnar Axelsson

Íslendingar taka kynfæraþvott mjög alvarlega og gefa sér nokkrar mínútur í vandlega hreinsunarathöfn áður en þeir stinga sér í almenningslaugar. Þetta segir bandaríski blaðamaðurinn Iva Roze Skoch sem skrifar um reynslu sína af íslenskum sundlaugum á vefmiðilinn Global Post.

Skoch fjallar um leiðbeiningaspjaldið sem hangir í flestum sundlaugum á Íslandi og þær beinskeyttu leiðbeiningar sem þar eru gefnar um hvaða líkamshlutar skuli þvegnir í sturtunni, fyrir allra augum. „Þegar ég kom í kvennaklefann var ég staðráðin í því að þvo mér rétt fyrir sundið. Allsnakin og með vandlegu skrúbbi. Þegar ég opnaði skápinn minn blöstu leiðbeiningarnar aftur við mér: „Þvoðu þér nakin!““

Að sögn Skoch eru Bandaríkjamenn ekki vanir nekt á almannafæri. Íslendingar eigi hinsvegar erfitt með að skilja hvers vegna þeir eru svona tregir til að baða sig, og ráðleggur hún löndum sínum að æfa sig heima í að þvo líkamshlutana sex, sem sýndir eru á spjaldinu, áður en þeir fara í fyrsta skipti í sund.

„Og ég skal sko segja ykkur það að heimamenn fylgjast vel með. Ekki með nektinni, vel að merkja. Sem betur fer eru þeir af öllum stærðum og gerðum þarna líka. En þeir munu fylgjast vel með því að þú þvoir alla réttu líkamshlutana og takir ekki með þér neinar hryllilegar, útlenskar bakteríur í sundlaugina þeirra [...] Þannig að ef þú ætlar að heimsækja þetta ótrúlega land, vertu þá viðbúinn.“