Hjálmar Hjálmarsson bæjarfulltrúi í Kópavogi Árni Sæberg

Hjálmar Hjálmarsson, bæjarfulltrúi Næstbesta flokksins í Kópavogi og forseti bæjarstjórnar, segir að hann muni eftir sem áður standa við allar þær ákvarðanir sem hann hafi stutt hingað til. Hann segir að sá meirihluti, sem verið er að ræða um að mynda núna, þ.e. Listi Kópavogsbúa, Sjálfstæðis- og Framsóknarflokks, sé ekki starfhæfur.

„Það hljóta allir að sjá, nema ef til vill oddvitar þessara framboða,“ segir Hjálmar í yfirlýsingu sem hann sendi frá sér fyrr í kvöld.

Þar segist hann munu vinna samkvæmt fjárhagsáætlun fyrir árið 2012 og reiknar með því að hinir 6 bæjarfulltrúarnir sem greiddu henni atkvæði muni gera það einnig.

„Málefnasamningur gamla meirihlutans verður sá rammi sem ég mun vinna eftir sem og hingað til. Ég mun tala áfram fyrir þeim málefnum sem þar koma fram,“ segir Hjálmar.

„Í raun er ekkert að í starfsemi og rekstri bæjarins sem vert er að hafa stórar áhyggjur af. Það er aðeins í efsta laginu, hjá hinum kjörnu fulltrúum, innan flokkana, sem ruglið, bullið og vitleysan hefur tekið völdin. Þessi staða er á okkar ábyrgð og það er okkar að leysa úr.“

Hjálmar hvetur alla til að kynna sér hugmyndir hans um samstarf allra flokka í bæjarstjórn. „Þar er gert ráð fyrir að framboðin skipti með sér verkum og deili ábyrgð á nefndarstjórnum og öðrum trúnaðarstörfum. Þá verði meirihlutafundir lagðir niður en í staðinn teknir upp vinnufundir oddvita allra flokka.  - Þessi vinnubrögð eru alls ekki ný af nálinni og vil ég minna á að allir flokkar unnu saman að fjárhagsáætlun Kópavogsbæjar þrjú ár í röð.“