Kringlan Eggert Jóhannesson

Þeir þingmenn sem komu upp í ræðustól við upphaf þingfundar í dag tóku allir jákvætt í þingsályktunartillögu sjálfstæðismanna um að lækka virðisaukaskatt á barnaföt. Nokkrir þeirra töluðu þá um að endurskoða þyrfti allt virðisaukaskattskerfið.

Magnús Orri Schram, þingmaður Samfylkingarinnar, var sá fyrsti til að vekja máls á tillögu Sjálfstæðisflokks í dag. Hann sagðist taka jákvætt í tillöguna og ef tækist að færa verslun barnafata hingað til lands kæmi það öllum til góða. Umræða síðustu daga hefði sýnt að mikill hluti barnafata væri keyptur erlendis og það væru í raun forréttindi ákveðinna hópa að geta keypt barnaföt ódýrari utan landsins.

Þá sagði Magnús að með því að lækka vörugjöld og gera skattkerfið einfaldara í framkvæmd myndi fást ávinningur til lengri tíma, auk þess að koma til móts við barnafjölskyldur, verslun og ríkissjóð. Þá sagði hann að grundvöllur slíkra breytinga væri undraverður árangur ríkisstjórnarinnar í ríkisfjármálum, og að ábyrg fjármálastjórn yrði til þess hægt yrði að einfalda skattkerfið á næstu árum.

Þorgerður Katrín Gunnarsdóttir, þingmaður Sjálfstæðisflokks, tók einnig til máls og hvatti stjórnarþingmenn til dáða í málinu. Hún benti á að nú hefði Samfylkingin stól fjármálaráðherra og gæti því breytt sköttum.

Gunnar Bragi Sveinsson, þingmaður Framsóknarflokks, fagnaði umræðunni og sagði gott ef stjórnvöld myndu nú horfa til baka og færa virðisaukaskattinn sem þau hefðu hækkað aftur til betra horfs.

Þá sagði Skúli Helgason, þingmaður Samfylkingarinnar, að heppilegt væri að endurskoða virðisaukaskatt og vörugjöld. Hins vegar væri heppilegt að láta endurskoðun á virðisaukaskatti á barnaföt hanga saman við heildarendurskoðun.

Að endingu tók Valgerður Bjarnadóttir, þingmaður Samfylkingar, til máls og tók undir það sem aðrir sögðu. Hún varaði þó við að stjórnvöld týndu sér í eyðslu og að spenna bogann of hátt. Mestu máli skipti að halda mittisólinni svolítið þröngri, frekar en að eyðileggja öll þau góðu verk sem unnin hefðu verið frá hruni.