Bjarni Þórðarson tryggingastærðfræðingur lést á Landspítalanum við Hringbraut, fimmtudaginn 2. febrúar s.l., 75 ára að aldri.

Bjarni fæddist í Reykjavík 5. ágúst 1936. Hann var sonur hjónanna Valgerðar Jóhannesdóttur og Þórðar Bjarnasonar bókara.

Bjarni lauk stúdentsprófi frá Menntaskólanum í Reykjavík 1956, fyrrihlutaprófi í verkfræði frá Háskóla Íslands 1960 og cand. act. prófi í tryggingastærðfræði frá Kaupmannahafnarháskóla 1964. Hann rak eigin ráðgjafastofu frá 1966-1973 og var jafnframt framkvæmdastjóri Sambands íslenskra tryggingafélaga 1967-1973. Bjarni hóf störf sem aðstoðarframkvæmdastjóri Íslenskrar endurtryggingar 1974 og var framkvæmdastjóri þar 1979-2008. Starfaði sem ráðgefandi tryggingastærðfræðingur frá árinu 2000 fyrir lífeyrissjóði og tryggingafélög.

Bjarni tók mjög virkan þátt í ýmsum hagsmunasamtökum tryggingafélaga, lífeyrissjóða og annarra félaga. Var m.a. formaður Landsambands lífeyrissjóða frá 1969 til 1984. Sat í stjórn Sambands íslenskra tryggingafélaga 1985-2000, þar af sem formaður 1986-1988. Hann sat einnig í stjórn Sparisjóðs Hafnarfjarðar um árabil.

Bjarni var virkur félagi í Rótarýklúbbi Hafnarfjarðar, og var umdæmisstjóri Rótarý-hreyfingarinnar á Íslandi 2003-2004.

Bjarni lætur eftir sig eiginkonu, Kristínu Guðmundsdóttur lífeindafræðing, og þrjár dætur, Þórdísi, Hildi og Valgerði.