Samtök verslunar og þjónustu hafa áhyggjur af öryggismálum. Eggert Jóhannesson

Þjófnaðarbrot í verslunum eru orðin skipulagðari en áður. Erfiðlega hefur gengið að fá lögreglu og aðra í réttarvörslukerfinu til að taka á þessum vanda af festu.

Öryggismál í verslunum eru ávallt til umfjöllunar á vettvangi Samtaka verslunar og þjónustu, enda virðist sá vandi sem fylgir þjófnaðarbrotum í verslunum sífellt vera að aukast.

Brotin eru skipulagðari en áður og erfiðlega hefur gengið að fá lögreglu og aðra í réttarvörslukerfinu til að taka á þessum vanda af festu. Í mörgum tilfellum þurfa verslanir einnig að taka sig á og upplýsa starfsfólk sitt betur um það sem þarf að varast, segir í frétt frá Samtökum verslunar og þjónustu.

Í gær var haldinn almennur félagsfundur hjá SVÞ þar sem lögreglan veitti mönnum innsýn í brotastarfsemi af þessu tagi og hversu gífurlega skipulögð hún er. Fundur þessi var fróðlegur en þó fyrst og fremst sláandi og sannfærði alla viðstadda um umfang þess vanda sem við er að etja.

Fundurinn sannfærði viðstadda einnig um að það er margt sem verslunin getur betur gert til að fræða starfsfólk sitt um þessi mál. Stefna samtökin að því að taka þau mál fyrir með markvissari hætti en verið hefur hingað til.

Einnig liggur fyrir að vekja enn á ný athygli stjórnvalda á þessum gífurlega vanda. Því miður hefur það ekki borið tilætlaðan árangur hingað til. Stjórnvöld verða að gera sér grein fyrir því að hér er um skipulega glæpastarfsemi að ræða sem nauðsynlegt er að berjast gegn á sama hátt og annarri slíkri starfsemi. Fyrir dyrum standa fundir með innanríkisráðherra, ríkissaksóknara og dómstólaráði í þessu skyni, segir í frétt frá SVÞ.