Sandgerði í forgrunni. www.mats.is

Skuldir og skuldbindingar Sandgerðisbæjar nema 456% af tekjum og uppfylla ekki sveitarstjórnarlög sem tóku gildi um áramót. Þetta segja fulltrúar minnihlutans. Á fundi bæjarstjórnar fyrir helgi voru samþykktar fjárhagsáætlun fyrir árið 2012 og þriggja ára áætlun.

Allir flokkar stóðu saman að gerð fjárhagsáætlunar fyrir sveitarfélagið, en þegar kom að því að gefa út sameiginlega yfirlýsingu höfnuðu fulltrúar minnihlutans því alfarið. Í bókun Sjálfstæðisflokks og Framsóknarflokks segir að, ljóst hafi verið að grípa þyrfti til verulegra aðhaldsaðgerða í formi niðurskurðar og hækkana á álögum. Jafnframt hafi verið lögð áhersla á að tryggja störf hjá bæjarfélaginu þar sem Sandgerðisbær glími við mesta atvinnuleysi á landinu.

Þá segir: „Það er erfið ákvörðun og ekki sársaukalaus að leggja auknar álögur á íbúa en því miður óhjákvæmileg. Margir berjast í bökkum fyrir vegna fjárhagserfiðleika og atvinnumissis en við munum leggja áherslu á að tryggja velferðarkerfið til að styðja við þá sem eru verst settir. [...] Staða Sandgerðisbæjar er grafalvarleg, skuldir og skuldbindingar nema 456% af tekjum og uppfylla ekki ný sveitastjórnarlög sem tóku gildi 1. janúar 2012. Þau kveða á um að sveitarfélög megi ekki skulda meira en 150% af reglulegum tekjum.“

Langt í land með að standast ákvæði laga

Samfylkingin lét einnig bóka vegna fjárhagsáætlunarinnar. Í bókuninni segir að ljóst hafi verið í upphafi kjörtímabilsins að erfitt verkefni væri að ná tökum á rekstri og skuldastöðu Sandgerðisbæjar. „Þá verður að hafa í huga að í nýjum sveitarstjórnarlögum eru settar stífar kröfur um fjármál sveitarfélaga. Í dag á Sandgerðisbær langt í land með að standast ákvæði þessara laga og eigi að viðhalda fjárhagslegu sjálfstæði sveitarfélagsins er ekki annar valkostur en að halda áfram með það verk að taka verulega til í fjármálum þess.“

Ástæða þess að svo illa er komið fyrir Sandgerði er, að mati fulltrúa Samfylkingarinnar, vöxtur sveitarfélagsins á árunum 2002-2010. Þá hafi átt sér stað gífurlega mikil uppbygging en á sama tíma jukust rekstrargjöld og skuldir með slíkum hraða að grípa verður til aðgerða í ár. „Bæjarfulltrúar S-listans gera sér fyllilega grein fyrir því að ýmsar af þeim ákvörðunum sem nú eru teknar í fjárhagsáætlunargerð ársins 2012 eru erfiðar fyrir marga í því samfélagi þar sem atvinnuleysi er mest á landinu og fjárhagsleg staða margra heimila er erfið.“