Öll hesthús verði skattlögð eins
Tekist er á um álagningu fasteignaskatta á hesthús. Morgunblaðið/Kristinn
Haraldur Þórarinsson, formaður Landssambands hestamannafélaga, fagnar því að Reykjavíkurborg hafi beint þeim tilmælum til Alþingis að breyta lögum sem varða fasteignaskatta á hesthús, en hann leggur áherslu á að hesthús alls staðar á landinu verði skattlögð með sama hætti.
Haraldur segir að hestamenn séu í nokkur ár búnir að vera að þrýsta á Samband íslenskra sveitarfélaga og ráðherra á um að tekið verði á þessu máli.
Lögin sem um er deilt eru frá árinu 1995, en 2005 kom fyrst upp ágreiningur um skattlagningu hesthúsa þegar Árborg ákvað að færa hesthús í þéttbýli úr A-flokk í C-flokk sem þýddi verulega hækkun á fasteignagjöldum. Í kjölfarið fór málið til yfirfasteignamatsnefndar, en hestamenn töpuðu málinu þar.
Haraldur segir að þessi niðurstaða þýði að í Árborg séu hesthús sem eru staðsett með um 200 metra millibili skattlögð með tvennum hætti. Hann segir að í Hafnarfirði, Garðabæ, Kópavogi og Mosfellsbæ hafi hesthús verið færð úr A-flokki í C-flokk, en skattprósentunni hafi samt ekki verið breytt. Hestamenn í þessum sveitarfélögum séu því að greiða sömu eða svipaða fasteignaskatta og áður eða á bilinu 0,5-0,65%. Reykjavíkurborg hafi hins vegar fært hesthús úr A-flokki í C-flokk og við það hafi fasteignaskattsprósenta farið úr 0,225% í 1,65%.
Haraldur segir þessa mismunun óþolandi. Það eigi að skattleggja alla hestamenn eins, óháð því hvar þeir búa. „Hesthús er hesthús hvar sem það er staðsett,“ segir hann.
Haraldur segir gott ef Alþingi tekur af skarið í þessum efnum, en hann hefur áhyggjur af því að þingið fari að reyna að skattleggja hesthús eftir því hvort atvinnurekstur á sér stað í hesthúsinu eða hvort það er notað til tómstunda. Hann bendir á að mörkin milli þessa séu stundum óljós. Sum hesthús séu hluta úr árinu notuð til atvinnurekstrar. Hann segir líka að ef hesthús séu notað til atvinnurekstrar eigi að skattleggja þann atvinnurekstur með almennum hætti.
Haraldur segir að hestamenn ætli að höfða mál fyrir héraðsdómi til að fá úrskurði yfirfasteignamatsnefndar breytt. Í úrskurðinum hafi ekki verið fjallað um það álitamál hvort heimilt sé að mismuna hestamönnum eftir því hvar þeir búa. Á þetta verði látið reyna fyrir héraðsdómi.
