mbl.is/Ómar

Kostnaður vegna Herjólfs í fyrra var um 250 milljónir umfram fjárheimildir. Miðað við óbreytt ástand á siglingum Herjólfs til Vestmannaeyja verður kostnaður í ár 300-400 milljónir umfram fjárveitingar ársins.

Í yfirliti frá Vegagerðinni kemur fram að rekstur Vestmannaeyjaferjunnar Herjólfs hefur reynst Vegagerðinni talsvert kostnaðarsamari en áætlanir og fjárheimildir gerðu ráð fyrir á árinu 2011. Fyrir það fyrsta hefur reksturinn reynst erfiðari vegna þess að ýmist er siglt til Þorlákshafnar eða til Landeyjahafnar. Viðbótarkostnaður vegna þessa var að hluta til bættur í fjáraukalögum 2011 og með hækkuðum fjárframlögum 2012. Það sem hins vegar setur fjárhagsáætlanir úr skorðum er miklu umfangsmeiri viðgerð á skipinu á síðasta ári en í fyrstu hafði verið gert ráð fyrir. Þannig reyndist hagkvæmt að taka upp aðalvél skipsins og gera aðrar lagfæringar sem hefði mátt láta bíða til þessa árs en ákveðið var að gera samhliða öðrum lagfæringum við slipptöku 2011.

Fjarvera skipsins frá þjónustu við Vestmannaeyjar var því lengri en gert var ráð fyrir með auknum kostnaði við leigu á Breiðafjarðarferjunni Baldri. Hins vegar má gera ráð fyrir því að frátafir verði þeim mun minni á þessu ári þar sem skipið telst nú í mjög góðu ástandi og þarf því ekki að fara aftur í slipp á þessu ári. Þessu til skýringar skal þess getið að regluleg slipptaka skipsins er annað hvert ár.

Kostnaður vegna Herjólfs 2011 er um 250 milljónir umfram fjárheimildir. Miðað við óbreytt ástand á siglingum Herjólfs til Vestmannaeyja verður kostnaður 2012 300-400 milljónir umfram fjárveitingar ársins.