Teymi á Landspítala vegna innri geislameðferðar krabbameins í blöðruhálskirtli. Af vef LSH.

Fyrstu sjúklingarnir með staðbundið krabbamein i blöðruhálskirtli voru meðhöndlaðir með innri geislameðferð hérlendis á Landspítala í síðustu viku.

Hefðbundið er að gefa ytri geislameðferð eða fjarlægja blöðruhálskirtilinn ef uppræta á staðbundið krabbamein í kirtlinum. Nálægt eitt hundrað karlar fara í slíka meðferð árlega. Meðferðin getur haft áhrif á stjórnun þvagláta og kyngetu.  Þetta kemur fram í frétt á vef Landspítalans.

Í völdum tilvikum er hægt að gefa innri geislameðferð en hún er talin hafa minni aukaverkanir í för með sér.  Á undanförnum árum hafa Íslendingar farið til Svíþjóðar til slíkrar meðferðar og hafa Sjúkratryggingar Ísland (SÍ) greitt  kostnaðinn. 

Nú hafa náðst samningar á milli Landspítala og Sjúkratrygginga Íslands um að meðferðin verði veitt hérlendis.  Það er gert með fulltingi Margrétar Einarsdóttur læknis sem starfar í  Lundi í Svíþjóð en hún hefur um árabil veitt slíka meðferð. 

Á LSH hefur orðið til öflugt teymi lækna, eðlisfræðinga, hjúkrunarfræðinga og sjúkraliða sem veita meðferðina. Um tíu íslenskir karlar eru taldir uppfylla árlega þau skilyrði sem þessi aðferðarfræði krefst. 

„Hér er á ferðinni þróun í heilbrigðisþjónustu hérlendis sem nýtist þessum völdu sjúklingum beint en öðrum óbeint.  Þá væri þessi þróunarvinna ekki framkvæmanleg nema með stuðningi og skilningi Sjúkratrygginga Íslands á verkefninu,“ segir Eiríkur Jónsson, yfirlæknir þvagfæraskurðlækningadeildar LSH.

Baldvin Þ. Kristjánsson læknir hefur yfirumsjón með innri geislameðferð krabbameins í blöðruhálskirtli á Landspítala. Af vef LSH.