Lífeyrissjóðunum er ætlað að safna iðgjöldum í sjóði, ávaxta þá og greiða síðan lífeyri til sjóðsfélaga við starfslok. mbl.is/Helgi Bjarnason

Nefnd sem falið var að rannsaka lífeyrissjóðina fór ofan í rekstur hvers og eins sjóðs. Nefndin mun gera grein fyrir mati sínu á sjóðunum hverjum fyrir sig í um 800 blaðsíðna skýrslu sem kynnt verður eftir hádegið í dag.

Hinn 24. júní 2010 samþykkti stjórn og varastjórn Landssamtaka lífeyrissjóða að fara þess á leit við ríkissáttasemjara að hann skipaði þriggja manna nefnd til að gera úttekt á fjárfestingarstefnu, ákvarðanatöku og áhættumati við fjárfestingar lífeyrissjóðanna í aðdraganda bankahrunsins í október 2008. Þingmannanefnd, sem fór yfir rannsóknarskýrslu Alþingis, hafði áður hvatt til þess að slík rannsókn færi fram.

Í nefndina voru skipaðir: Hrafn Bragason hæstaréttardómari, formaður, Héðinn Eyjólfsson viðskiptafræðingur og Guðmundur Heiðar Frímannsson heimspekiprófessor. Með nefndinni hafa starfað Kristján Geir Pétursson lögfræðingur og Þórunn Ansnes viðskiptafræðingur.

Nefndin hefur nú lokið störfum með útgáfu viðamikillar skýrslu sem tekur til starfsemi og fjárfestinga allra 32 aðildarsjóða Landssamtaka lífeyrissjóða á árunum 2006-2009.

Skýrslan er 800 blaðsíður og er í fjórum bindum. Í fyrri hluta skýrslunnar er gerð grein fyrir starfsemi lífeyrissjóðanna almennt, en í síðari hluta skýrslunnar er rekstur, fjárfestingar og áhættumat einstakra sjóða skoðað. Nefndin leggur síðan mat á rekstur hvers sjóðs fyrir sig.

Ítarlega verður fjallað um skýrsluna á mbl.is í dag og í Morgunblaðinu á morgun.