mbl.is/Golli

Flest bendir til að kostnaður Vegagerðarinnar við snjómokstur í desember og janúar sé um 800 milljónum meiri en áætlanir gerðu ráð fyrir. Ef fram fer sem horfir má því reikna með að kostnaður ársins 2012 fari töluvert fram úr áætlunum enda fjárheimildir enn lægri en árið 2011.

Ögmundur Jónasson innanríkisráðherra gerði grein fyrir þessum kostnaði á ríkisstjórnarfundi í morgun.

Þjónusta Vegagerðarinnar í vetur hefur verið mun kostnaðarsamari vegna tíðarfars en áætlanir og fjárveitingar hafa gert ráð fyrir. Á árinu 2010 kostaði vetrarþjónusta á landinu öllu um 1,6 milljarða. Um síðustu áramót er heildarkostnaður vegna þessarar þjónustu hins vegar kominn í tæpa 2,2 milljarða eða 600 milljónir umfram áætlanir og fjárheimildir.

Þessi aukni kostnaður fellur fyrst og fremst til á SV-horni landsins, en þó hefur einnig verið nokkur aukakostnaður víða um land. Vegagerðin sér um að þjónusta allar þrjár meginleiðir frá höfuðborgarsvæðinu, þ.e. Reykjanesbraut, Suðurlandsveg og Vesturlandsveg, auk helstu stofnbrauta á svæðinu. Frá því í nóvember og til áramóta hefur verið um viðvarandi snjómokstur og hálkueyðingu að ræða langt umfram það sem gerist í venjulegu árferði. Þannig er áætlað að desember einn og sér sé nálægt 400 milljónum kostnaðarsamari en sami mánuður næstu ár þar á undan. Að auki var s.l. vor mjög erfitt m.t.t. hálkuvarna og var víða hálkuvarið í 6 vikur umfram það sem venjulegt má teljast.

Bráðabirgðauppgjör bendir til að kostnaður vegna janúar 2012 verði svipaður og í desember þ.e. allt að 400 milljónum umfram áætlanir. Ef fram fer sem horfir má því reikna með að kostnaður ársins 2012 fari einnig töluvert fram úr áætlunum enda fjárheimildir enn lægri en árið 2011.