Nefndarmenn kynntu skýrsluna um lífeyrissjóðina í dag. Morgunblaðið/Kristinn

Guðmundur Heiðar Frímannsson heimspekiprófessor segist ekki sannfærður um að það hafi verið rétt ákvörðun hjá lífeyrissjóðunum að gera gjaldeyrisvarnasamninga við bankana, en sjóðirnir töpuðu miklum fjármunum á þeim.

Ekki er búið að gera upp endanlegt tap lífeyrissjóðanna vegna þessara gjaldeyrisvarnasamninga. Landsbankinn er reyndar búinn að semja við sjóðina um uppgjör, en ágreiningur er enn milli sjóðanna og Arion banka og Íslandsbanka.

Í skýrslu rannsóknarnefndar um lífeyrissjóðina segir að tap lífeyrissjóðanna vegna þessara samninga verði 36 milljarðar, en þá er búið að taka tillit til skuldauppgjörs, en sjóðirnir áttu miklar kröfur á bankana þegar þeir hrundu sem kemur til frádráttar við uppgjör á gjaldeyrisvarnasamningunum.

„Ég held að það sé alveg óhætt að segja að við vorum frekar á þeirri skoðun að menn hefðu átt að gæta meiri varúðar en gert var. Stjórnendur lífeyrissjóðanna hefðu átt að velta fyrir sér hvort yfirleitt var þörf á þessum gjaldeyrisvarnasamningum,“ sagði Guðmundur Heiðar, sem var einn þriggja nefndarmanna.

„Lífeyrissjóðirnir eru langtímafjárfestar og þeir eiga að hugsa þetta í 10-30 árum og þá vaknar sú spurning hvort það er þörf á gjaldeyrisvörnum þegar horft er til svo langs tíma. Er ekki betra að taka bara sveiflurnar? Þetta var a.m.k. okkar mat.“

Nefndin bendir á að uppgjörsákvæði hafi vantað í gjaldeyrisvarnasamningana. Mikilvægt sé að setja ítarlegt ákvæði um gjaldeyrisvarnir í lög og að sjóðirnir endurskoði stefnu sína í þessum málum.