Spákort sem sýnir veðurspá á miðnætti í kvöld. www.vedur.is

Versnandi veður verður á fjallvegum um vestan- og norðvestanvert landið seint í kvöld, hríðarveður og slæmt skyggni verður fram á nóttina um leið og skil lægðar ganga yfir. Búast má við hviðum allt að 30-40 m/s á Kjalarnesi og undir Hafnarfalli frá því um kl. 21 til 22 í kvöld og fram á nóttina. 

Eins um svipað leyti undir Eyjafjöllum og litlu síðar í Öræfasveit.

Þetta kemur fram í tilkynningu frá Vegagerðinni.

Hálkublettir eru á Sandskeiði og hálka og skafrenningur á Hellisheiði en hálka í Þrengslum. Hálka eða  hálkublettir  eru í uppsveitum Árnes- og Rangárvallasýslum.

Á Vesturlandi er hálka á Holtavörðuheiði og Bröttubrekku, hálka eða hálkublettir víðast hvar á öðrum leiðum. Á Vestfjörðum er flughálka frá Bjarnafirði að Gjögri. Hálka eða hálkublettir eru á öðrum leiðum á Vestfjörðum.

Á Norðurlandi vestra eru hálkublettir á flestum leiðum og hálka á Vatnsskarði. Á Norðausturlandi er flughálka á Hólasandi. Hálka er á Mývatns- og Möðrudalsöræfum annars eru hálkublettir víða.

Á Austurlandi eru hálkublettir á Breiðdalsheiði en aðrar leiðir eru greiðfærar og á Suðausturlandi er allar helstu leiðir greiðfærar.