Akranes. Þorvaldur Örn Kristmundsson

Bæjarstjórn Akraness samþykkti á fundi sínum fyrir helgi að veita átta milljón króna framlag í sérstakan sjóð sem stofnaður verður vegna endurnýjunar sýningarbúnaðar Bíóhallarinnar á Akranesi. Framlagið er veitt í tilefni 70 ára kaupstaðarafmælis Akraneskaupstaðar á árinu.

Áætlaður heildarkostnaður við endurnýjunina er 17-19 milljónir króna. Í greinargerð sem birt er í fundargerð bæjarstjórnar segir að nú sé svo komið að búnaður Bíóhallarinnar til kvikmyndasýninga sé orðinn úreltur, enda kvikmyndavélar hússins liðlega hálfrar aldar gamlar. Vélunum hafi verið vel við haldið og gegni þær hlutverki sínu sem slíkar en hins vegar er tæknin sjálf úrelt og ekki er lengur hægt að fá kvikmyndir til sýningar á því formi sem umræddar kvikmyndavélar nota, þ.e. á filmur á stórum spólum.

Þá segir að tæknin sem notuð er hafi tekið miklum breytingum og það hafi áhrif á notkun og framtíð Bíóhallarinnar. Hér eftir verði filmur óþarfar en kvikmyndum þess í stað hlaðið niður af veraldarvefnum til sýningar.

Einnig opnist margvíslegir möguleikar með því að endurnýja sýningarbúnaðinn, s.s. beinar útsendingar frá menningar- og íþróttaviðburðum og tónleikum. „Við núverandi aðstæður þarf að leggja af bíósýningar á meðan húsið er í annarri notkun. Þetta hefur í för með sér að t.d. leikfélög og -flokkar, skólar bæjarins og fleiri geta nýtt húsið betur án þess að trufla hefðbundnar bíósýningar. Með tilkomu hins nýja sýningarbúnaðar getur Bíóhöllin því enn betur þjónað hlutverki sínu sem menningarhús Akraness.“

Á þessu ári eru liðin 70 ár frá vígslu Bíóhallarinnar á Akranesi, en það voru hjónin Haraldur Böðvarsson og Ingunn Sveinsdóttir sem færðu Akraneskaupstað húsið að gjöf. Eins og fram kemur í gjafabréfi og skipulagsskrá kvikmynda- og tónleikahússins Bíóhallarinnar var tilgangur gjafarinnar að styðja mannúðar- og menningarmál innan Akraneskaupstaðar. „Óhætt er að fullyrða að á þessum 70 árum sem liðin eru hafi Bíóhöllin verið ómetanleg fyrir leikhúslíf og alla menningu á Akranesi. Akurnesingar standa því í þakkarskuld við gefendur.“