Stefán Halldórsson (h), fyrrverandi framkvæmdastjóri Lífeyrissjóðs verkfræðinga, og Sigurður Áss Grétarsson (v), fyrrverandi stjórnarformaður sjóðsins. mbl.is/Sverrir Vilhelmsson

Afskriftir hjá Lífeyrissjóði verkfræðinga á skuldabréfum banka og sparisjóða árin 2008 - 2010 voru næstum því helmingi hærri en öll lífeyrisiðgjöld til sjóðsins á árinu 2009. Þetta er á meðal þess sem fram kemur í umfjöllun um sjóðinn í nýútkominni skýrslu Úttektarnefndar Landssamtaka lífeyrissjóða.

Afskriftirnar námu samtals rúmlega 5,1 milljarði króna. Langmestu afskriftirnar voru hjá Kaupþing banka, 2.122 mkr., og Glitni banka, 2.068. mkr. Á meðal annarra stórra afskrifta hjá sjóðnum má nefna 276 mkr. afskriftir hjá VBS fjárfestingarbanka og 182 mkr. afskriftir hjá Landsbanka Íslands. Aðrar afskriftir námu samtals um 506 milljónum króna.

Í umfjöllun skýrslunnar um sjóðinn eru m.a. kaup hans á lánshæfistengdu skuldabréfi frá hinum svissneska UBS banka. Skuldabréfið virkaði þannig að útibú UBS í Jersey gaf út skuldabréf að fjárhæð 3,1 milljarð króna og seldi skuldatryggingu á Kaupþing og Glitni. UBS var þó ekki skuldari bréfsins þrátt fyrir að vera útgefandi þess. UBS skuldabréfið bar reglulega vexti ásamt því að vera tengt þróun skuldatryggingaálags á bæði Kaupþing banka og Glitni banka. Í skýrslunni kemur fram að með kaupum á þessu bréfi hafi lífeyrissjóðurinn því verið að veðja á að bankarnir tveir, Kaupþing og Glitnir, myndu ekki falla.

Í skýrslunni eru þessi skuldabréfakaup gagnrýnd með þeim rökum að á þeim tíma sem fjárfestingin var gerð hafi skuldatryggingaálag á bönkunum tveim verið mjög hátt, en þetta háa skuldatryggingaálag endurspeglaði mat fjárfesta á líkum á gjaldfalli bankanna. Einnig segir í skýrslunni að undirliggjandi áhætta hafi falist í undirliggjandi skuldabréfum á Glitni og Kaupþing og áhættan af fjárfestingunni því verið mjög mikil.

Afskriftir Lífeyrissjóðs verkfræðinga vegna UBS skuldabréfsins námu um 760 milljónum króna hjá Glitni og 770 milljónum króna hjá Kaupþingi.