mbl.is/Rax / Ragnar Axelsson

Hálka og hálkublettir eru á Hellisheiði, í Þrengslum og á Lyngdalsheiði samkvæmt upplýsingum frá Vegagerðinni í morgun. Sömu sögu er að segja um Mosfellsheiði sem og víða á Suðurlandi.

Þá er snjór á Holtavörðuheiði, í Svínadal og á Fróðárheiði en hálka á Bröttubrekku sem og Vatnaleið og Laxárdalsheiði. Hálkublettir eru víða á vegum í Dalasýslu og á norðanverðu Snæfellsnesi.

Þá er hálka eða hálkublettir á flestum leiðum á Vestfjörðum og snjór á Steingrímsfjarðarheiði. Þæfingsfærð er á Þröskuldum og er unnið að því að hreinsa þessar leiðir að sögn Vegagerðarinnar. Sömu sögu er að segja af Klettshálsi.

Sama er ennfremur að segja af Þverárfjalli, Siglufjarðarvegi og af Hálsum og Hófaskarði norðaustanlands. Þá er hálka á Fjarðarheiði á austurlandi og hálkublettir á Breiðdalsheiði en flestar aðrar leiðir eru hins vegar greiðfærar. Allar helstu leiðir suðaustanlands eru greiðfærar.