mbl.is/Hjörtur

Töluvert mikill erill var hjá lögreglunni á höfuðborgarsvæðinu í nótt og í morgun. Þannig var bifreið stöðvuð á Miklubraut um klukkan fimm vegna gruns um ölvunarakstur og var ökumaðurinn færður á lögreglustöð.

Um tuttugu mínútum síðar fékk lögreglan tilkynningu um að rúða hefði verið brotin í bifreið á Hverfisgötu en þar hafði mjög ölvaður maður kastað bjórflösku á eftir bifreið og brotið í henni afturrúðuna.

Fáeinum mínútum eftir það var tilkynnt um bifreið sem hafði verið ekið á ljósastaur við Miklubraut. Vegfarandi sá bifreiðina yfirgefa staðinn og fylgdi henni eftir og gat hann vísað lögreglu á bifreiðina þar sem henni hafði verið lagt í Hólmavaði. Þar fannst ökumaðurinn ölvaður undir stýri og var handtekinn. Tekin verður skýrsla af honum síðar í dag.

Um sexleytið var tilkynnt innbrot í húsnæði við Bolholt og var myntskúffu stolið þar með um 10-15 þúsund krónum. Skömmu síðar var bifreið stöðvuð á Hverfisgötu og ökumaðurinn grunaður um vímuefnaakstur. Var hann færður á lögreglustöð í kjölfarið.

Þá var tilkynnt innbrot í húsnæði við Sóltún um klukkan sjö en ekki liggur fyrir á þessari stundu hvort einhverju var stolið.

Um hálfátta í morgun var síðan tilkynnt um bifreið sem ekið hafði verið á aðra við Arnarhraun. Bifreiðin sem ekið var á kastaðist við það á þriðju bifreiðina. Ökumaðurinn sem olli tjóninu ók af vettvangi en hann var stöðvaður við Flókagötu, handtekinn og færður á lögreglustöð. Hann er grunaður um akstur undir áhrifum vímuefna.