easyJet mbl.is/Skapti

Breska lágfargjaldaflugfélagið EasyJet hefur ákveðið að fljúga áfram á milli Íslands og Lundúna næsta vetur. Er sú ákvörðun að fljúga til Íslands allt árið tekin þar sem flugleiðin hefur fengið góðar viðtökur, bæði hér á landi og í Bretlandi, segir í tilkynningu.

Yfir átta þúsund sæti hafa selst hingað til en fyrsta vél flugfélagsins hingað til lands fer í loftið 27. mars nk. Áhugi Íslendinga var töluvert meiri en gert var ráð fyrir. Flogið verður  þrisvar í viku; á þriðjudögum, fimmtudögum og sunnudögum.

„Við  erum mjög ánægð með viðtökurnar sem EasyJet hefur fengið á Íslandi og við  munum halda áfram að gera viðskiptavinum okkar kleift að ferðast milli Reykjavíkur og London með auðveldum og ódýrum hætti næsta vetur,“ er haft eftir Hugh Aitken, framkvæmdastjóra viðskipta EasyJet í Bretlandi, í frétt frá félaginu.

Í tilkynningunni segir að EasyJet reki stærsta flugleiðakerfi í Evrópu og sé leiðandi á 100 stærstu leiðum Evrópu og 50 stærstu flugvöllum Evrópu. EasyJet fljúgi yfir 600 flugleiðir milli 129 flugvalla í 29 löndum. Yfir 300 milljónir Evrópubúa búa innan klukkustundar aksturs við flugvöll sem EasyJet flýgur frá sem er meira en nokkurt annað flugfélag, segir í tilkynningunni.