Gagnaver Verne Global. mbl.is

Gagnaver Verne Global er opnað í dag að Ásbrú í Reykjanesbæ. Nú eru liðin tæp fjögur ár frá því fyrirtækið keypti stórar byggingar af Þróunarfélagi Keflavíkurflugvallar.

Fram kemur í tilkynningu frá iðnaðarráðuneytinu að síðan þá hafi verið markvisst unnið að uppbyggingu á alþjóðlegu gagnaveri sem selji þjónustu sína til stórra fyrirtækja í Bandaríkjunum og Evrópu.

Segir að áform Verne gangi út á markvissa stækkun og að árið 2017 verði gagnaverið fullbúið í fjórum byggingum. Þegar rekstur verði kominn á fullan skrið sé reiknað með að 100 störf skapist hjá fyrirtækinu.

Með tilkomu gagnaversins skapist jafnframt ýmis tækifæri fyrir fyrirtæki sem nýti sér þjónustu gagnavera að staðsetja sig nálægt gagnaverinu á Ásbrú. Allar tengingar séu með besta móti bæði með tilliti til rafmagns og gagnatenginga.

„Fyrsti viðskiptavinur Verne Global er bandaríska fyrirtækið Datapipe en það sérhæfir sig í umhverfisvænum lausnum í upplýsingatækni. Umhverfisstofnun Bandaríkjanna hefur veitt fyrirtækinu viðurkenningu vegna umhverfisstefnu þess og forstjóri Datapipe, Robb Allen, segir að Verne gefi fyrirtækinu kost á því að halda áfram forystu í umhverfismálum.

Tilkoma alþjóðlegs gagnaversiðnaðar á Íslandi er í fullu samræmi við hina nýju heildstæðu orkustefnu sem unnið hefur verið að undanfarin ár og var nýlega lögð fram til kynningar á Alþingi. Einnig fellur slíkur iðnaður vel að þeirri stefnumótun sem unnið er að varðandi beina erlenda fjárfestingu á Íslandi. Íslensk stjórnvöld hafa á undanförnum árum unnið markvisst að því að kynna Ísland sem áhugaverðan kost fyrir alþjóðleg gagnaver og er nú ánægjulegt að sjá fyrsta alþjóðlega gagnaverið taka formlega til starfa,“ segir í tilkynningu frá iðnaðarráðuneytinu.